Павел Латушка: Хаос у Расіі – гэта шанец на свабодную Беларусь

«У суботу мы бачылі вялікую матывацыю сярод беларусаў, якія назіраюць за тым, што адбываецца ў Расіі», – кажа Павел Латушка.

Павел Латушка

фота: Уладзімір Пац/Польскае радыё

У суботу мы ўбачылі вялікую матывацыю сярод беларусаў, якія назіраюць за тым, што адбываецца ў Расіі, кажа ў інтэрв'ю Gazeta Polska Codziennie былы амбасадар Беларусі ў Польшчы, кіраўнік Народнага антыкрызіснага ўпраўлення Павел Латушка. Паводле яго, хаос у Расіі дасць Беларусі шанец вярнуць свабоду. Апазіцыянер запэўніў, што Абʼяднаны Пераходны Кабінет Беларусі падрыхтаваны да любога сцэнара.

Палітык нагадаў, што кабінет пад старшынствам Святланы Ціханоўскай, сабраўся ў суботу на паседжанне.

«Мы стварылі крызісную каманду, у склад якой увайшлі прадстаўнікі больш за дзесяці беларускіх дэмакратычных арганізацый. І мы пачалі падрыхтоўку да рэалізацыі плана «Перамога», які павінен ажыццяўляцца ўнутры краіны. Мы таксама кантактуем з беларускімі добраахвотнікамі, якія ваююць ва ўкраінскай арміі, але мы ведаем, што яны ўваходзяць у склад украінскай арміі, таму вырашальным будзе хутчэй рашэнне ўкраінскага боку. Тым не менш, напрыклад, камандзір палка Каліноўскага заявіў, што жаўнеры гатовыя дзейнічаць», – адзначыў былы амбасадар Беларусі ў Польшчы.

Ён дадаў, што Аб’яднаны Пераходны Кабінет таксама пачаў камунікацыю з міжнароднымі партнёрамі ў Францыі, Украіне, Літве, Латвіі і іншых краінах, каб выпрацаваць з імі стратэгію. «У гэтай сітуацыі мы працавалі даволі актыўна«, – сказаў Павел Латушка.

Паводле яго, хаос у Расіі – гэта шанец для Беларусі вярнуць свабоду: «У суботу мы бачылі вялікую матывацыю сярод беларусаў, якія назіраюць за тым, што адбываецца ў Расіі», – падкрэсліў палітык у размове з выданнем Gazeta Polska Codziennie.

аз