Паўночная Карэя валодае ядзернай зброяй, распрацавала праграму балістычных ракет і навучылася рабіць кібератакі, піша каментатар Financial Times.
«На працягу некалькіх месяцаў людзі папярэджвалі аб узмацненні супрацоўніцтва (членаў) варожай восі, якая складаецца з Расіі, Паўночнай Карэі, Ірана і Кітая. (…) Аднак з гэтай групы Паўночная Карэя прыцягнула менш за ўсё ўвагі на Захадзе», — піша Гідэон Рахман (Gideon Rachman). Між тым, як ён падкрэслівае, падтрымка Пхеньянам Масквы з'яўляецца пакуль самым «драматычным» доказам жыццяздольнасці гэтай «варожай восі».
Па словах экспертаў па Карэйскім паўвостраве, паўночнакарэйскі лідар Кім Чэн Ын некалькі гадоў таму адмовіўся ад намаганняў па паляпшэнню адносінаў з ЗША і абраў палітыку канфрантацыі з Паўднёвай Карэяй і ЗША.
У студзені вядомыя эксперты па Карэі Роберт Карлін і Зігфрыд Хекер папярэдзілі, што «Кім Чэн Ын прыняў стратэгічнае рашэнне пачаць вайну».
Прыкметы радыкалізацыі падыходаў Пхеньяна да міжнародных спраў множацца з часам.
У студзені Кім абвясціў аб адмове ад даўняй мэты аб'яднання з Поўднем, у чэрвені Пхеньян падпісаў дамову аб узаемнай ваеннай дапамозе з Масквой, а ў апошнія дні ён падарваў дарогі, якія злучаюць дзве Карэі.
Каментатар Financial Times мяркуе, што Захад памыляецца, ставячыся да Паўночнай Карэі як да жарту — як да «краіны дрэнна падагнаных касцюмаў і дрэнных прычосак, якая хутчэй становіцца героем чарговага мема, чым запускае ядзерныя боегалоўкі».
«Беднасць у Паўночнай Карэі не азначае, што рэжым адсталы ва ўсіх адносінах. Хутчэй, гэта паказвае, што Кім ставіць ваеннае развіццё вышэй за дабрабыт простых людзей», — піша аўтар.
Нягледзячы на міжнародную ізаляцыю, рэжым Кіма здолеў стварыць ядзерную зброю, развіць праграму балістычных ракет і дасягнуў здольнасці здзяйсняць кібератакі.
Спасылаючыся на паведамленні аб удзеле паўночнакарэйскіх вайскоўцаў у вайне Расіі супраць Украіны, Гідэон Рахман піша, што «ў вайне загінулі або атрымалі раненні больш за 600 тысяч расійскіх салдат, 10 тысяч вайскоўцаў паўночнакарэйскага спецназа не схіляць чашу вагаў перамогі». Але ў паўночнакарэйскай арміі на службе ў агульнай складанасці 1,3 мільёна вайскоўцаў, якія могуць выкарыстоўвацца Расіяй у якасці «гарматнага мяса».
Яшчэ два ўзброеныя канфлікты?
«Што з гэтага для Кіма? – пытаецца Рахман. — Цяпер мы ў асноўным гаворым аб перадачы тэхналогій і фінансавай дапамозе з боку Расіі. Аднак паўночнакарэйскі лідар можа таксама (...) думаць аб патэнцыйным канфлікце на Карэйскім паўвостраве. Калі ён падтрымае Расію ў еўрапейскай вайне, калі-небудзь Расія адкажа ўзаемнасцю ў азіяцкім канфлікце?».
Рост напружанасці на Карэйскім паўвостраве можа пайсці на карысць Пекіну, паколькі ўскладніць ЗША абарону Тайваня ў выпадку магчымага нападу Кітая на востраў. «Усё гэта ставіць вельмі складаныя пытанні перад ЗША, ЕС і Паўднёвай Карэяй, якія спрабуюць пазбегнуць эскалацыі, як ва Украіне, так і на Карэйскім паўвостраве. Аднак неўзабаве яны могуць апынуцца перад выбарам: дазволіць Расіі перамагчы Украіну з дапамогай Паўночнай Карэі, або значна павялічыць падтрымку Украіны», — рэзюмуе Рахман.
dziennik.pl/вх