Аляксандр Лукашэнка правёў перамовы з прэзідэнтам Экватарыяльнай Гвінеі Тэадорам Абіянгам Нгемам Мбасагам.
Сустрэча прайшла ў Палацы незалежнасці і суправаджалася поціскам рукі дыктатараў. Чакаюцца перагаворы ў вузкім і пашыраным складах, падпісанне дакументаў і заявы для СМІ.
Тэадора Абіянг Нгема Мбасага прыбыў з афіцыйным візітам у Беларусь учора.
Нагадаем, Мбасага прыйшоў да ўлады ў 1979 годзе, зрынуўшы дыктатарскі рэжым свайго дзядзькі. Пасля неаднаразова прызначаў на дзяржаўныя пасады членаў сваёй сям'і: так, у 2012 годзе віцэ-прэзідэнтам стаў яго сын Тэадора Нгема Абіянг Мангу. У 2016 годзе дыктатара «пераабралі» на новы сямігадовы тэрмін, а Тэадора Нгема Абіянг Мангу атрымаў пасаду першага віцэ-прэзідэнта. У адпаведнасці з заканадаўствам краіны ў выпадку смерці бацькі ён зойме яго пост.
Мбасагу абвінавачваюць у канібалізме. У верасні 2016 г. за публікацыю артыкула пра гэта быў затрыманы галоўны рэдактар ліберыйскай газеты New Democrat. Аўтары публікацыі сцвярджалі, што дыктатар афрыканскай дзяржавы – канібал, ён санкцыянуе выкраданне сваіх апанентаў, а затым есць некаторыя часткі іх целаў, у прыватнасці, печань і мазгі. Таксама было напісана, што за 30 гадоў кіравання Нгема Мбасага назапасіў вялізныя багацці, у той час як большая частка грамадзян краіны жыве ў галечы, амаль не маючы доступу да адукацыі і медычнага абслугоўвання.
За час кіравання Мбасагі ў краіне ўсталяваўся культ яго асобы. У 2003 годзе дзяржаўнае радыё абвясціла, што ён «падобны Богу на нябёсах» і знаходзіцца «у пастаянным кантакце з Усемагутным», валодаючы «усёй уладай над людзьмі і рэчамі». У 2013 годзе КНДР узнагародзіла Мбасагу прэміяй імя Кім Чэн Іра.
Хартыя'97
нг
