Як выглядае дзень у беларускай калоніі — распавялі ў відэа з розных куткоў свету былыя палітзняволеныя.
«У мяне цяпер 10 гадзін вечара. Я адпачываю, пераглядаю любімы серыял і ем аліўе. Побач са мной ляжыць мой любімы рыжы кот. У калоніі ў гэты час палітзняволеныя жанчыны кладуцца спаць пасля цяжкага дня на швейнай фабрыцы, бясконцых дзяжурстваў у атрадзе і за яго межамі, пасля некалькіх гадзін гвалтоўнага прагляду дзяржТВ, пасля таго, як насілі 30-кілаграмовыя мяшкі з гароднінай. А заўтра ў іх гэты дзень паўторыцца. І выходных у іх там ніколі не наступіць.
У мяне кожны дзень адбываецца нешта новае: розная ежа, розныя людзі, часам — розныя гарады і краіны. У палітвязняў пшонка змяняе аўсянку, дзяжурствы па прыбіральні змяняе калідор, цяжкая зіма змяняе цяжкую восень. У некаторых доўжыцца гэта год, а ў некаторых — ужо чатыры года. І невядома, колькі сезонаў так будуць змяняць адзін аднаго. Я шчыра спадзяюся, што хутка ва ўсіх палітвязняў надыдуць шчаслівыя дні і ўтульныя вечары, і што хутка яны сустрэнуцца са сваімі роднымі і блізкімі, і нарэшце адчуюць свабоду!» — сказала асуджаная па «справе студэнтаў» Марыя Каленік.
Крыніца: ПЦ «Вясна»/юл