У Сейме Літвы 22 студзеня адбылося паседжанне камітэту па замежных справах, на якім у закрытым рэжыме абмеркавалі сітуацыю, што склалася з выкарыстаннем герба Пагоня на «пашпарце новай Беларусі». Гэты сімвал у Літве лічаць сваім, нагадвае «Свабода».
Выданне LRT са спасылкай на кіраўніка Камітэта па замежных справах Рэмігіюса Матузаса паведаміла, што на паседжанне запрасілі прадстаўнікоў Міністэрства ўнутраных спраў, Міністэрства замежных спраў, Дэпартаменту міграцыі і Геральдычнай камісіі.
«Галоўная мэта — наладзіць адзіны падыход, знаходзіцца ў агульным інфармацыйным полі і выпрацаваць узгодненую пазіцыю, паколькі пытанне далікатнае», - працытавала Рэмігіюса Матузаса агенцтва BNS. Паводле яго, Літва не прызнае на сваёй тэрыторыі «пашпарта новай Беларусі».
«Я б ахарактарызаваў гэтую адзіную пазіцыю як сімвалічны дакумент, які не мае ні юрыдычнай, ні дыпламатычнай сілы. Ён не будзе прызнаны сапраўдным на тэрыторыі Літоўскай Рэспублікі. Гэта выключна сімвалічны дакумент», - падкрэсліў старшыня парламенцкага камітэта.
Пасля паседжання Рэмігіюс Матузас паведаміў, што менавіта гэта і пацвердзілі ўдзельнікі абмеркавання - згодна з дзейным літоўскім заканадаўствам, такі пашпарт або дакумент не можа быць прызнаны.
Старшыня камітэта падкрэсліў, што тым беларусам, якія жывуць у Літве і ў якіх скончыўся тэрмін дзеяння пашпартоў, і яны не могуць вярнуцца на радзіму і атрымаць новы, Літва выдае дакументы, з якімі яны могуць падарожнічаць.
Дыскусія аб беларускім і літоўскім сімвалах пачалася пасля таго, як анансавалі тэрміны прыёму заяў на «пашпарт новай Беларусі» і апублікавалі яго вокладку з Пагоняй.
Шэраг літоўскіх грамадскіх актывістаў і прадстаўнікоў кансерватыўнай партыі Літвы прасоўваюць ідэю, што беларусы не маюць права выкарыстоўваць сімвал Пагоні, бо ён ёсць часткай толькі літоўскай гісторыі.
Прэзідэнт Літвы Гітанас Наўседа заявіў, што ў выкарыстанні Пагоні ў дызайне «пашпартоў новай Беларусі» ён не бачыць праблемы. Але дадаў, што трэба абмеркаваць юрыдычныя і дыпламатычныя дэталі праекту. Такім чынам, Наўседа пацвердзіў словы, якія раней прагучалі з ягонай канцылярыі.
Перад гэтым дэпутаты Сейму ад партыі «Саюз Айчыны - хрысціянскія дэмакраты Літвы» абурыліся выкарыстаннем Пагоні ў «пашпартах новай Беларусі».
У Міністэрстве замежных спраў Літвы на іх заяву адказалі, што літоўскі дзяржаўны герб у дызайне тых пашпартоў не выкарыстоўваецца.
У Літве дзяржаўны герб - Пагоня. У Беларусі сімвал Пагоня быў дзяржаўным гербам з верасня 1991 года да 1995-га, калі Аляксандр Лукашэнка правёў нелегітымны рэферэндум, па выніках якога гэты герб замянілі на мадыфікаваны савецкі.
Сімвал Пагоня паходзіць з часоў Вялікага Княства Літоўскага, агульнай часткі гісторыі Літвы і Беларусі. У той жа час выявы беларускай і літоўскай Пагоні адрозніваюцца паміж сабой.
аз