Беларускі пісьменнік Альгерд Бахарэвіч уганараваны адной з найпрэстыжнейшых літаратурных прэмій Еўропы — Ляйпцыгскай кніжнай прэміяй за еўрапейскае паразуменне. Урачыстасць адбылася ўчора на сцэне канцэртнай залы Гевандхаус у Ляйпцыгу.
Дзяржаўная міністарка культуры і турызму Саксоніі Барбара Клепш уручыла аўтару ўзнагароду за ягоны раман «Сабакі Еўропы» — нагадаем, што журы прэміі вылучыла твор Альгерда Бахарэвіча сярод іншых прэтэндэнтаў аднагалосна.
«Немагчыма з большай жарсцю напісаць пра Еўропу», — адзначыла нямецкі палітык на цырымоніі. Аўтаркай laudatio — урачыстай прамовы ў гонар аўтара — выступіла швейцарскі літаратурны крытык і рэдактарка Зігліндэ Гайзэль. Кульмінацыяй вечара сталася прамова падзякі беларускага літаратара на нямецкай мове, якая выклікала працяглыя авацыі.
«Магчыма, беларускіх мытнікаў проста напужала слова «Еўропа» на вокладцы маёй кнігі. Еўропафобія беларускага рэжыму паталагічная. Яны настолькі баяцца быць Еўропай, нібы гэта злачынства. Небяспечная ерась, за якую трэба спальваць на вогнішчы. Або інфекцыя, якую неабходна спыняць на мяжы. Вось жа, мой раман «Сабакі Еўропы» зрабіўся першым мастацкім літаратурным творам, афіцыйна забароненым у Беларусі рэжымам Лукашэнкі», - гаварыў у прамове Альгерд Бахарэвіч.
reform.news/ав