Грамадзянін Беларусі Сяргей Шустаў трапіў у палон да ўкраінскіх вайскоўцаў пад Тарэцкам у Данецкай вобласці.
Відэазапіс з ім апублікаваў украінскі вайсковы журналіст Андрэй Цапліенка. Ён расказаў, што беларус меў сем судзімасцяў за крадзяжы. У палон мужчына трапіў праз сем дзён пасля таго, як пачаў ваяваць.
«Расійскае камандаванне не ставіла падраздзяленню беларуса канкрэтных задач, патрабуючы ад штурмавікоў толькі руху наперад», — цытуе Радыё Свабода словы Цапліенкі.
Сяргей Шустаў нарадзіўся 12 студзеня 1981 года. Ён расказаў, што апошняе пакаранне пасля прысуду адбываў у Расіі. «З калоніі мяне забралі і прывезлі сюды. Спачатку ў Варонеж, потым у Растоў-на-Доне», — паведаміў ён.
Мужчына сказаў, што з РФ яго перакінулі ў Данецкую вобласьць — у Горлаўку, а адтуль пад Тарэцк. Ён ваяваў у 103-м палку, які дыслакуецца ў Растове і ўваходзіць у 150-ю мотастралковую дывізію Сухапутных войскаў Расіі.
Паводле яго, за вайскоўцамі ішлі заградатрады, каб не даць ім адступіць: «Назад дарогі не было ў сувязі з тым, што ззаду нашы ж нас і застрэляць»
Гэта ўжо як мінімум пяты беларус, які ваяваў на баку Расіі і трапіў ва ўкраінскі палон. Раней украінскі бок называў імёны чатырох нашых суайчыннікаў, якія знаходзяцца ў іх у палоне, — Андрэй Лапатнёў, Яўген Камянькоў, Артур Яфрэмаў і Дзмітрый Ананчык.
Сваякі яшчэ трох грамадзян Беларусі, якія пайшлі ваяваць на баку РФ, заявілі пра іх знікненне без вестак. Гэта Яўген Ільін, Міхаіл Шалгун і Андрэй Кулага.
эж