Пра тое, што адбылося, былая вязнярка паведаміла 1 красавіка ў эфіры «Звычайнай раніцы», паведамляе Позірк.
Паводле яе слоў, Камітэт дзяржаўнай бяспекі ўнёс Сяргея Канавалава ў «тэрарыстычны спіс».
«Гэта проста, калі шчыра, нонсэнс для нас, таму што тата не быў затрыманы па адміністрацыйных артыкулах, на ім не было крымінальных спраў, толькі падазрэнні, а ён у тэрарыстычным спісе», — сказала Канавалава.
Некаторы час таму, паведаміла экс-палітвязынка, у доме яе бацькі правялі ператрус «з нагоды яго падазрэння ў тэрарызме ў Баранавічах».
Падставай для падазрэння, паводле яе слоў, стала тое, што мабільны тэлефон Канавалава быў у зоне, дзе адбыўся «падрыў чыгункі ў горадзе Баранавічы». Антаніна не ўдалася ў падрабязнасці, пра якую справу канкрэтна ідзе гаворка і калі менавіта быў ператрус.
«Гэта значыць, гэта ўжо даказальны факт таго, што ён можа быць датычны, і гэтага, у прынцыпе, дастаткова. Яшчэ знайсці якога-небудзь аператыўнага супрацоўніка, які яго вёў і які бачыў, — усё, справа ў прынцыпе ёсць. Вы можаце заехаць [у месцы пазбаўлення волі] ад 15 гадоў. <…> Маральны прэсінг маёй сям'і да гэтага часу не скончаны».
Антаніна Канавалава, якая была даверанай асобай Святланы Ціханоўскай на прэзідэнцкіх выбарах 2020 года, пакінула Беларусь у сярэдзіне сакавіка. Аб выхадзе на волю 36-гадовай жанчыны стала вядома 15 снежня 2024 года. Па дадзеных праваабарончага цэнтру «Вясна», яна вызвалілася па памілаванні.
Позірк/ав