Міністэрства ўнутраных спраў вярнула магчымасць праверкі абмежаванняў на выезд з Беларусі анлайн, паведаміла «Вясна». Цяпер сайт міністэрства выглядае, як і раней - у асабістым кабінеце на сайце МУС у раздзеле фізічных асоб можна праверыць нявыплачаныя штрафы па лініі ДАІ і абмежаванні на выезд з Беларусі. Ніякіх тлумачэнняў, куды знікала магчымасць праверкі, у МУС не далі.
Нагадваем, учора журналісты «Медыязона» заўважылі, што МУС прыбрала са свайго сайта магчымасць праверкі сябе на наяўнасць забароны на выезд з Беларусі.
Юрыстка Праваабарончага цэнтра «Вясна» Святлана Галаўнёва адзначае, што агулам у выпадку з абмежаваннем выезду фіксуецца шмат шэрых зон і нявызначанасцей, напрыклад, наконт таго, хто ўвёў абмежаванне на выезд, на якой падставе і на які тэрмін.
«Часам увогуле немагчыма зразумець, ці ўведзена абмежаванне, не паспрабаваўшы выехаць з краіны», - заявіла юрыстка.
Паводле яе, гэта можна разглядаць як парушэнне свабоды перамяшчэння, гарантаванай арт. 30 Канстытуцыі і арт. 12 Міжнароднага пакта аб грамадзянскіх і палітычных правах.
«Сама па сабе наяўнасць абмежаванняў можа быць абгрунтаванай, але парушэнне адбываецца ў тым, як яны ўводзяцца – без празрыстасці, без выразных працэдур абскарджання і без належнага доступу да інфармацыі», - дадала Святлана Галаўнёва.
аз