Пра гэта паведаміла Польская правінцыя аблатаў Марыі Беззаганнай, да якой належыць Місія ў Беларусі. На час арышту святары атрымалі перадачу.
«Мы застаёмся ў малітве і заахвочваем да малітвы ўсіх людзей добрай волі. Просім таксама аб малітве за парафіяльную супольнасць у Шуміліне, якая была пазбаўлена пастырскай апекі», — напісаў ксёндз Павел Гамулак, прэс-сакратар Польскай правінцыі місіянераў аблатаў Беззаганнай Марыі.
Місіянераў затрымалі ў Віцебскай дыяцэзіі. Айцы Анджэй Юхневіч OMI і Павел Лемех OMI служаць у дыяцэзіяльным санктуарыі Маці Божай Фацімскай у Шуміліне. Падставай для арышту стала нібыта дыверсійная дзейнасць на шкоду беларускай дзяржаве.
Аблаты нагадваюць, што на пачатку расійскага ўварвання ва Украіну ксёндз Андрэй, які з’яўляецца настаяцелем Аблацкай місіі ў Беларусі, публічна выказаў салідарнасць з украінскім народам, просячы аб малітве за хутчэйшае заканчэнне вайны.
ПР/юл