Святлана Ціханоўская: Вызваленне ўсіх палітзняволеных застаецца нашым прыярытэтам

Паводле беларускай лідаркі дзеля гэтага трэба выкарыстоўваць усе даступныя цяпер інструменты, уключна з персанальнымі санкцыямі.

Святлана Ціханоўская выступіла на адкрыцці міжнароднай канферэнцыі «Адказнасць за злачынствы і парушэнні правоў чалавека ў Беларусі»

t.me/tsikhanouskaya

Беларуская лідарка Святлана Ціханоўская выступіла на адкрыцці міжнароднай канферэнцыі «Адказнасць за злачынствы і парушэнні правоў чалавека ў Беларусі», якая адбываецца ў Вільні, паведаміла ейная прэс-служба.

У сваёй прамове Ціханоўская падкрэсліла важнасць міжнароднай падтрымкі і прыцягнення да адказнасці вінаватых у рэпрэсіях супраць беларускага народа. Асобную ўвагу лідарка звярнула на вар’яцкія прысуды, якія атрымліваюць звычайныя грамадзяне за пастаўлены «лайк» ці фота ў сацсетках.

«Такія прысуды, як два гады турмы за размяшчэнне карыкатуры на дыктатара, самі па сабе з'яўляюцца карыкатурай на правасуддзе. Але мы павінны ставіцца да іх вельмі сур'ёзна, таму што ў турмах яны разбураюць чалавечыя жыцці», - заявіла палітык.

Яна таксама дадала, што вызваленне ўсіх палітзняволеных застаецца прыярытэтам дэмакратычных сілаў.

«Мы павінны працягваць міжнародны ціск датуль, пакуль кожны з іх не апынецца на волі. Аднаўленне справядлівасці – гэта не проста патрэба, гэта наш адзіны шлях назад да дэмакратыі», - дадала яна.

Святляна Ціханоўская згадала пра міжнародныя злачынствы рэжыму: захоп самалёта, міграцыйны крызіс, дэпартацыя ўкраінскіх дзяцей, саўдзел Лукашэнкі ў вайне, за якія ніхто не быў прыцягнуты да адказнасці.

«Таму мы павінны выкарыстоўваць даступныя цяпер інструменты: персанальныя санкцыі, універсальную юрысдыкцыю і міжнародныя суды», - пераконвала Ціханоўская.

У мерапрыемстве ў Вільні бяруць удзел як прадстаўнікі беларускіх дэмакратычных сілаў і праваабарончых арганізацый, так і прадстаўнікі Міністэрства замежных справаў, Генеральнай пракуратуры, Міністэрства юстыцыі Літвы і дэпутаты Еўрапарламента.

аз