Святар знаходзіцца ў СІЗА КДБ у Мінску з лістапада 2023 года, пра яго справу афіцыйна нічога не паведамляецца. Суд пройдзе ў закрытым рэжыме, таму тое, у чым канкрэтна абвінавачваюць пробашча, не стане вядома і падчас суда. Ксёндз Генрых не прызнае сябе вінаватым, мае кепскі стан здароўя.
Каля месяца таму Апостальскі нунцый арцыбіскуп Антэ Ёзіч, які ўжо завяршыў сваю місію ў Беларусі, сустракаўся з Аляксандрам Лукашэнкам. Паводле афіцыйнага паведамлення, «падчас сустрэчы былі закрануты таксама пытанні, якія хвалююць каталіцкую супольнасць у Беларусі, Лукашэнка паабяцаў іх разгледзець і паспрыяць іх хутчэйшаму вырашэнню».
Вернікі, добра знаёмыя з сітуацыяй ксяндза Генрыха Акалатовіча, адзначаюць, што чакалі па выніках гэтай сустрэчы вызвалення святара, піша katolik.life.
Вернікі лічаць, што валожынскага пробашча могуць вызваліць пасля суда праз працэдуру памілавання — дзеля таго, каб «хворы чалавек не памёр у турме, каб не было шуму»:
«Хаця, якое можа быць «памілаванне», калі ксёндз Генрых не прызнае сябе вінаватым? Але ў цяперашняй сітуацыі самае галоўнае — выйсці адтуль любымі метадамі, а потым час усё расставіць на свае месцы. Усё ў руках толькі аднаго Бога — таму трэба не пакідаць малітву».
Што да другога зняволенага каталіцкага святара, айца Андрэя Юхневіча, якога трымаюць у СІЗА Віцебска і не паведамляюць, у чым яго абвінавачваюць, то расследаванне па ягонай справе пакуль працягваецца. Святар трымаецца ў добрым настроі, просіць перадаваць лекі (нядаўна ён перанёс хваробу) і толькі самае неабходнае. Амаль увесь вольны час знаходзіцца ў малітве.
вх