Януш Вайцяхоўскі прадставіў свае пастулаты ў галіне сельскай гаспадаркі. У выпадку, калі Еўрапейскі Парламент зацвердзіць яго кандыдатуру, Вайцяхоўскі будзе намагацца абмежаваць бюракратыю, зраўняць субсідыі для аграрыяў ды паспрабуе абараняць высокія выдаткі на сельскую гаспадарку ў ЕЗ.
Выступаючы перад дэпутатамі Еўрапарламента, Януш Вайцяхоўскі спачатку гаварыў па-ангельску, аднак потым перайшоў на родную мову. Паляк абяцаў прыкласці ўсе намаганні, каб аблегчыць жыццё еўрапейскіх фермераў.
-Супольная аграрная палітыка Еўрапейскага Звязу вымагае спрашчэння і гарманізацыі. Буду прапаноўваць і падтрымліваць абмежаванне бюракратыі. Сяляне хочуць працаваць на зямлі, гадаваць быдла, а не займацца бясконцымі паперамі.
Януш Вайцяхоўскі падкрэсліў, што выдаткі на сельскую гаспадарку павінны быць справядлівыя, адпаведна не мае быць розніцы ў даплатах для фермераў з Усходняй і Заходняй Еўропы.
Гэта была другая і ўжо астатняя спроба Януша Вайцяхоўскага пераканаць еўрапейскіх дэпутатаў падтрымаць яго кандыдатуру на пасаду камісара па сельскай гаспадарцы.
IAR/эж