Найбуйнейшы аэрапорт у Паўднёвай Карэі абраны стратэгічным партнёрам планаванага ў Польшчы Цэнтральнага камунікацыйнага порта. Намеснік міністра інфраструктуры Марцін Гарала(Marcin Horała) паведаміў, што карэйскі міжнародны аэрапорт „Інчхон” выйграў у тэндары з портам „Нарыта” ў Японіі, які абслугоўвае сталічны раён Токіа.
Эксперты, звязаныя з карэйскім аэрапортам, будуць планаваць і кансультаваць рашэнні, датычныя планаванай у Польшчы інвестыцыі, то бок міжнароднага аэрапорта „Салідарнасць” у Баранаве паміж Варшавай і Лоддзю.
Нагадваем, галоўны міжнародны аэрапорт Паўднёвай Карэі быў адкрыты ў 2001 годзе. У мінулым годзе карэйскі хаб абслужыў 71 мільён пасажыраў.
Паводле планаў урада, аэрапорт „Салідарнасць” павінен быць пабудаваны ў 2027 годзе. У кастрычніку 2027 года плануецца прыняць першых пасажыраў. Першапачаткова аэрапорт будзе абслугоўваць 30-45 мільёнаў пасажыраў штогод, максімальная прапускная магутнасць разлічаная на 100 мільёнаў чалавек у год.
аз