У мінулым годзе ў Дзень культурніцкай разнастайнасці ў «Поліне», сярод іншых мерапрыемстваў, была зладжаная беларускамоўная экскурсія. Зацікаўленне было вялікім, а таму музей вырашыў пашырыць сваю прапанову для беларусаў.
Так, з кастрычніка пачаліся рэгулярныя беларускамоўныя экскурсіі, на якія можна патрапіць бясплатна. Бліжэйшыя з іх пройдуць 12 сакавіка, 16 красавіка, 14 траўня, 5 лістапада і 3 снежня.
Гэта шпацыры па сталай экспазіцыі, расказвае Катажына Якубовіч з «Поліна»:
-Можна даведацце не толькі, як выглядала Варшава і яўрэйская гісторыя іншых гарадоў, але таксама можна даведацца пра беларускі кантэкст. Нашым экскурсаводам з'яўляецца Таццяна Казак, якая шмат гадоў жыве ў Польшчы, паходзіць з Гродна. Падчас экскурсіі яна стараецца ўводзіць беларускі кантэкст, што вельмі цікава. Асобы, якія прыходзяць у музей могуць паглядзець, што гэта не толькі польска-яўрэйская гісторыя, але і польска-яўрэйска-беларуская. Могуць пазнаёміцца з крыху іншай гістарычнай перспектывы.
Падчас знаёмства з гісторыяй яўрэяў у Польшчы ўдзельнікі завітаюць у Нясвіж, Мір і Гвоздзец, дзе наведаюць сінагогу, каб палюбавацца прыгожымі роспісамі і паразважаць над іх сімволікай. Падчас экскурсіі Таццяна Казак расказвае біяграфіі цікавых асобаў, а іх лёс сведчыць пра ўзаемапранікненне розных ідэнтычнасцяў і культур.
Музейныя шпацыры не будуць адбывацца з чэрвеня па верасень, але музей рыхтуе іншую прапанову для беларускай супольнасці. Гэта будуць шпацыры па раёне, у якім знаходзіцца музей.
-Гэта месца, якое вельмі моцна звязанае з яўрэйскай гісторыяй. Падчас гэтага шпацыру можна будзе даведацца не толькі пра польска-яўрэйскую гісторыю мікрараёну, але і сучасную Варшаву.
Спадзяюся, што гэта не будзе адзіная прапанова. Я кажу спадзяюся, бо мы яшчэ развіваем праекты, скіраваныя да беларускай супольнасці. Пад канец мінулага году, у снежні, мы арганізавалі сустрэчу з прадстаўнікамі розных беларускіх арганізацый, каб пазнаёміцца з патрэбамі беларускай супольнасці, паглядзець, у якім напрамках яны працуюць у галіне культуры. Я спадзяюся, што ў будучыні гэта нам дасць магчымасць супрацы, – расказвае Катажына Якубовіч.
21 траўня адзначаецца Дзень культурніцкай разнастайнасці. Штогод Музей Полін ладзіць сустрэчы, шпацыры, на якіх паказвае гэтую разнастайнасць сучаснай Варшаву. Сёлета чарговы раз будзе падрыхтавана беларускамоўная сустрэча, дадае Катажына Якубовіч:
-У траўні мы запрашаем на шпацыр (гэта будзе нешта іншае, чым у штомесячных шпацырах), на якім мы будзем расказваць пра культуру, традыцыі і звычаі. Сустрэча будзе праходзіць на беларускай мове, таксама на іншых. Будзе напэўна ўкраінская. Дарэчы, мы ладзім шпацыры і на ўкраінскай мове. Таксама запрашаю, бо там мы глядзім на гісторыю з украінскай перспектывы. Думаю, што гэта цікава, паглядзець на гісторыю з розных перспектываў. Канешне, запрашаю і на шпацыры на польскай мове, бо тут можна паглядзець яшчэ з іншага боку. Адна выстава, але на столькі розныя экскурсіі.
Катажына Якубовіч адзначае, што музей «Полін» імкнецца ствараць дыялог паміж усімі супольнасцямі, якія жывуць у Польшчы. Таму ў музей ахвотна запрашаюцца прадстаўнікі розных супольнасцяў на шпацыры, розныя мерапрыемствы:
-Мы запрашаем не толькі палякаў і яўрэяў, але і іншых жыхароў. Беларусаў, украінцаў, афганцаў, іракцаў, віетнамцаў, то бок прадстаўнікоў розных супольнасцяў, для якіх мы рыхтуем розныя рэчы. Спадзяюся, што для тых, хто прыйдзе да нас, гэта будзе не толькі візіт у музей, але гэта будзе сустрэча розных людзей. Мы таксама стараемся рабіць сустрэчы для адразу некалькіх супольнасцяў, каб яны таксама маглі наладжваць сувязі. Гэта нашая мара, якую мы стараемся рэалізоўваць. Таму візіт у музей, гэта не толькі знаёмства з пэўным адрэзкам гісторыі, паколькі гісторыя мае адлюстраванне ў жыцці.
Музей «Полін» знаходзіцца ў Варшаве, вул. Анелевіча 6. У чацвер уваход у музей бясплатны.
Дарэчы, Музей гісторыі польскіх яўрэяў, бадай, адзіны, якія мае аўдыёгіды на беларускай мове.
ав
слухайце аўдыё
