У Жэшаве распачынаецца Трынаццаты фестываль «Усход культуры – Еўрапейскі стадыён культуры». Гэта адзін з самых цікавых фестываляў у Польшчы. Ён спалучае элементы розных музычных жанраў, тэатру, фатаграфіі, кіно і выяўленчага мастацтва.
З 2013 года Еўрапейскі стадыён культуры праводзіцца ў рамках фестывалю «Усход культуры», які аб'ядноўвае мастацкія суполкі гарадоў Усходняй Польшчы і мастакоў з краін Усходняга партнёрства. Фестываль «Усход культуры» арганізаваны Нацыянальным цэнтрам культуры і трыма польскімі гарадамі: Жэшавам, Люблінам і Беластокам.
Падчас гала-канцэрту ў рамках фестывалю ў Жэшаве выступіць Юстына Стэчкоўска ў дуэце з латышскім гуртом Brainstorm, гурт BOKKA з эстонскім музыкам Андрэсам Коперам, Сара Джэймс, Анджэй Смолік з брытанскім музыкам Кевам Фоксам і ўкраінскай спявачкай Алінай Паш.
У ліпені (6-9 ліпеня) фестываль «Усход культуры» пераедзе ў Люблін, а ў жніўні (24-27 жніўня) – у Беласток. Усяго за 11 дзён у чэрвені, ліпені і жніўні на фестывальных сцэнах выступіць больш за сто артыстаў. Праект быў прафінансаваны Міністэрствам культуры і нацыянальнай спадчыны.
IAR/нг