Знікла старшыня Каардынацыйнай рады Беларусі Анжаліка Мельнікава. З 2020 года яна жыла ў Польшчы.
Інфармацыю пра знікненне старшыні Каардынацыйнай рады пацвярджаюць у Міністэрстве ўнутраных спраў і адміністрацыі Польшчы. Міністр унутраных спраў, каардынатар спецслужбаў Томаш Сямоняк паведаміў, што Анжаліка Мельнікава не была ў Польшчы шмат тыдняў і не прапала на тэрыторыі краіны. Паводле яго, службы праводзяць праверку па гэтым факце:
– Мы супрацоўнічалі з партнёрскімі службамі з іншых дзяржаў, у прыватнасці з той дзяржавы, на тэрыторыі якой, паводле нашых звестак, знаходзілася спадарыня Мельнікава. На дадзены момант магу толькі паведаміць, што няма ніякіх доказаў таго, што са спадарыняй Мельнікавай ці яе сям'ёй нешта здарылася на тэрыторыі Польшчы.
Раней знікненне беларускай апазіцыянеркі пракаментаваў у сацсетках прэс-сакратар Міністэрства ўнутраных спраў і адміністрацыі Польшчы Яцэк Дабжыньскі. Ён запэўніў, што польскія праваахоўныя органы будуць падтрымліваць дзеянні іншых краінаў і Каардынацыйнай рады Беларусі па ўстанаўленні месцазнаходжання Мельнікавай.
Інфармацыю пра знікненне апазіцыянеркі паведаміў беларускі праваабарончы цэнтр «Вясна». Паведамлялася, што таксама зніклі яе дочкі 6 і 12 гадоў, якія жылі з ёй у Варшаве.
IAR/эж