Спецыяльны пасланнік папы Францішка кардынал Матэа Зупі ў аўторак адпраўляецца ў Пекін, дзе сустрэнецца з прадстаўнікамі вышэйшых уладаў КНР, каб абмеркаваць магчымасці спынення вайны Расіі супраць Украіны, піша італьянская штодзёнка «La Repubblica».
Гэта «апошняя спроба стварыць расколіну міру» або «прынамсі давесці да спынення агню», піша выданне.
Паводле назіральнікаў, Папа лічыць Кітай адной з ключавых краін, дзякуючы якой удасца дасягнуць міру. Паездка ў Кітай з’яўляецца чацвёртай місіяй кардынала Зупі, старшыні епіскапату Італіі, па праблеме вайны Расіі з Украінай пасля візітаў у Кіеў, Маскву і Вашынгтон. Не выключана, што ў КНР Зупі сустрэнецца з прэм'ер-міністрам краіны Лі Цянам.
«Павінен быць мір, паводле выбару ўкраінцаў, з гарантыямі, у выніку прыхільнасці і намаганняў кожнага», – сказаў кардынал Зупі, якога цытуе агенцтва Ansa, у кулуарах пасяджэння Супольнасці Святога Эгідыё, які з нядзелі праходзіць у Берліне.
«Я лічу, як гэта было бачна нядаўна, што неабходна задзейнічаць усіх, асабліва тых, хто мае вялікае значэнне, такіх як, вядома, Кітай. Мір патрабуе намаганняў усіх, гэта не тое, што можна навязаць кім заўгодна», – дадаў папскі пасланнік на пытанне аб чаканнях у сувязі з будучым падарожжам.
Кардынал Зупі запэўніў, што ўсведамляе, што місія, у якой ён удзельнічае, не мусіць прынесці чаканых вынікаў, аднак адзначыў, што «калі нічога не рабіць, то не будзе паразы, але нічога не будзе зроблена. Заўсёды лепш паспрабаваць».
ав