Саміт ЕС: Будзе заклік да стварэння калідораў і гуманітарных паўз для дастаўкі дапамогі ў сектар Газа

Вайна на Блізкім Усходзе будзе самай важнай тэмай саміту ЕС, які пасля абеду пачынаецца ў Бруселі.

Ізраільскія салдаты рыхтуюцца да сцэнару наземных манеўраў у невядомым месцы каля мяжы з Газай у Ізраілі

PAP/EPA/HANNIBAL HANSCHKE

Заклік да стварэння калідораў і гуманітарных паўз для дастаўкі дапамогі ў сектар Газа ўключаны ў апошні праект прапаноў да саміту ЕС, які пачынаецца сёння ў другой палове дня ў Бруселі. Дакумент пабачыла карэспандэнтка Польскага радыё ў Бруселі Бэата Пламэцка. Яго канчатковае зацвярджэнне належыць лідарам 27 краін. Вайна на Блізкім Усходзе будзе самай важнай тэмай.

Напярэдадні саміту ішлі дыскусіі аб фармулёўках высноваў адносна Блізкага Усходу. Найбольш далёка ідучымі былі заклікі да спынення агню, якія ў сваю чаргу былі адхіленыя краінамі, якія падтрымліваюць Ізраіль у вайне супраць тэрарыстаў ХАМАС. Пазней сталіцы ЕС спрачаліся наконт таго, ці трэба заклікаць да адной гуманітарнай паўзы або некалькіх гуманітарных паўз, каб дапамагчы даставіць дапамогу ў сектар Газа.

Згодна з апошнімі падзеямі, еўрапейскія лідары павінны выказаць сваю глыбокую занепакоенасць пагаршэннем гуманітарнай сітуацыі ў Газе і заклікаць да хуткай, бяспечнай і бесперабойнай дастаўкі гуманітарнай дапамогі з выкарыстаннем усіх даступных сродкаў, уключаючы гуманітарныя калідоры і паўзы. Ёсць таксама заява аб тым, што Еўрапейскі Саюз будзе цесна супрацоўнічаць з партнёрамі ў рэгіёне, каб абараніць мірнае насельніцтва і забяспечыць доступ да ежы, вады, медыцынскай дапамогі і прытулку, але таксама забяспечыць, каб гэтая дапамога не выкарыстоўвалася тэрарыстычнымі арганізацыямі.

ав