Кіраўнік МУС Балгарыі Калін Стаянаў заявіў, што ўступленне Балгарыі ў Шэнгенскую зону ў марскіх і паветраных зносінах з'яўляецца выключным крокам да поўнай інтэграцыі краіны з Еўрапейскім саюзам. Паводле яго слоў, адкліканне Аўстрыяй права вета таксама зʼяўляецца вынікам напружанай працы, якую балгарскія ўлады правялі на балгарска-турэцкай мяжы. Міністр сказаў, што апошнія некалькі месяцаў у гэтым раёне, які лічыцца «варотамі» балканскага шляху нелегальных мігрантаў, было выключна спакойна.
Стаянаў таксама паведаміў, што пакуль няма канкрэтнай даты далучэння Румыніі і Балгарыі да Шэнгенскай зоны ў частцы сухапутных межаў. Перамовы пройдуць паміж зацікаўленымі краінамі, Аўстрыяй, якая выстаўляе дадтковы ўмовы, і Еўракамісіяй.
Кіраўнік МУС заявіў, што Балгарыя не пагодзіцца на кожную просьбу Аўстрыі. Урад у Вене, напрыклад, хоча, каб Балгарыя прымала ўсіх бежанцаў з Сірыі і Афганістана, якія знаходзяцца пад вартай у Аўстрыі. Калін Стаянаў запэўніў балгараў, што ім не трэба хвалявацца – краіна не прымае і не будзе прымаць людзей, за якіх не нясе адказнасці.
Румынія і Балгарыя будуць прынятыя ў Шэнгенскую зону з 31 сакавіка 2024 г. Грамадзяне Румыніі і Балгарыі змогуць падарожнічаць паветраным і марскім транспартам без пашпартоў у краіны Шэнгенскай зоны, у якую ўваходзяць 25 з 27 краін Еўрасаюза. У зону таксама ўваходзяць чатыры асацыяваныя з ЕС краіны: Швейцарыя, Нарвегія, Ісландыя і Ліхтэнштэйн.
Апошняй краінай, якая далучылася да Шэнгенскай зоны, была Харватыя. Яе далучэнне адбылося 1 студзеня 2023 года.
IAR/вх