У сераду Еўракамісія прадставіла першую стратэгію ў рамках так званага Саюза гатоўнасці. Установа заклікала грамадзян ЕС прыняць «актыўныя меры для падрыхтоўкі да крызісаў, такія як распрацоўка планаў на выпадак надзвычайных сітуацый для хатніх гаспадарак і назапашванне неабходных запасаў». Гэта частка стратэгіі гатоўнасці ЕС да крызісу, прадстаўленай у сераду камісарам Хаджой Лахбіб.
Стратэгія была распрацавана для забеспячэння лепшай каардынацыі ЕС і інфармаванасці грамадскасці ў адказ на шэраг патэнцыйных пагроз, такія як экстрэмальныя з'явы надвор'я, якія пагаршаюцца кліматычным крызісам, пандэміі, кібератакі і ваенныя ўварванні.
«Мы павінны падрыхтавацца да маштабных міжсектаральных інцыдэнтаў і крызісаў, уключаючы магчымасць узброенай агрэсіі, якая закране адну або некалькі дзяржаў-членаў», — падкрэсліваецца ў дакуменце.
«Пагрозы, з якімі сёння сутыкаецца Еўропа, больш складаныя, чым калі-небудзь, і ўсе ўзаемазвязаны», - сказала камісар па пытаннях гатоўнасці і кіравання крызісамі Хаджа Лахбіб, прадстаўляючы новую стратэгію.
Яна падкрэсліла, што важна «пераканацца, што людзі маюць неабходныя запасы мінімум на 72 гадзіны ва ўмовах крызісу». Адказваючы на пытанне аб тым, што трэба назапасіць грамадзянам, яна спаслалася на відэа ў сацсетках, на якім дэманструе ўласны «аварыйны заплечнік». Сярод рэчаў: дакументы ў воданепранікальным чахле, кансервы, вада ў бутэльках, запалкі, нож, наяўныя грошы, ігральныя карты, рацыя, лекі і невялікае радыё.
Акрамя таго, камісар ЕС адзначыла, што краіны ЕС павінны стварыць «стратэгічны рэзерв», які сабраў бы іншыя важныя рэсурсы, такія як медыцынскае, энергетычнае і транспартнае абсталяванне, а таксама спецыяльныя сродкі абароны ад хімічных, біялагічных, радыялагічных і ядзерных пагроз.
Polsat NEWS/ав