Сенатар Коры Букер (Cory Booker) пабіў рэкорд па самай доўгай прамове ў гісторыі амерыканскага Сената. Ён прабыў на трыбуне больш за 25 гадзін, крытыкуючы палітыку Дональда Трампа і яго ўрада, а таксама дзеянні Ілана Маска.
Папярэдні рэкорд належаў сенатару Строму Тэрманду, які ў 1957 годзе выступаў на працягу 24 гадзін і 18 хвілін, пратэстуючы супраць закона аб грамадзянскіх правах. Калі Коры Букер перавысіў гэты час, лідар дэмакратаў Чак Шумер папрасіў дазволу задаць пытанне, што дазволена рэгламентам. «Ці ты ведаеш, што толькі што пабіў рэкорд? Ці ведаеш, як ганарыцца табой гэты клуб? Ці ведаеш, як ганарыцца табой Амерыка? » — запытаўся Чак Шумер, пасля чаго разам з іншымі дэмакратамі ўзнагародзіў Букера бурнымі апладысментамі.
Аднак сенатар вырашыў працягнуць. «Я яшчэ не хачу заканчваць», — сказаў ён. Паводле правіл, падчас прамовы Букер не мог пакінуць залу нават для наведвання прыбіральні. У выніку яго выступленне доўжылася 25 гадзін і 4 хвіліны.
У сваёй прамове Коры Букер найбольш крытыкаваў скарачэнні выдаткаў, уведзеныя Дональдам Трампам і Іланам Маскам, якія закранулі дзясяткі тысяч федэральных работнікаў і абмежавалі праграмы дапамогі.
IAR/нг