З кожным годам у Польшчы значна павышаецца мінімальная зарплата. Ці рост коштаў працоўнай сілы прымусіць міжнародныя карпарацыі шукаць больш танныя месцы ў іншых краінах, што, адпаведна, прывядзе да лавіны звальненняў у Польшчы? Гэтым пытаннем задаецца Forsal.pl. Выданне нагадвае, што фінансавы гігант UBS плануе звольніць частку супрацоўнікаў – да 1200 чалавек. Штаб-кватэра кампаніі знаходзіцца ў Кракаве, а звальненні закрануць галоўным чынам офіс у Варшаве.
Як пісала Gazeta Wyborcza, у першыя тры месяцы гэтага года кампаніі з Кракава абвясцілі пра скарачэнне амаль 2 тысяч працоўных месцаў. Звесткі Муніцыпальнай біржы працы ў Кракаве паказваюць, што з пачатку года да 24 сакавіка дзевяць прадпрыемстваў паведамілі ў біржу аб сваім намеры правесці групавыя звальненні.
Аб якіх прадпрыемствах ідзе гаворка, невядома, але газета прыводзіць галіны, у якіх адбудуцца масавыя звальненні. Кампанія, якая займаецца навукова-даследчай дзейнасцю, намераная звольніць 145 чалавек. 139 чалавек атрымаюць паведамленне аб звальненні з бухгалтарскай фірмы. У гэты спіс таксама ўваходзіць кампанія, звязаная з азартнымі гульнямі і ўзаемнымі стаўкамі. Без працы застануцца 72 чалавекі. Згадваецца таксама кансалтынгавая фірма ў сферы ІТ, з якой, верагодна, сыдуць 32 асобы. Ёсць таксама дзве кампаніі з галіны праграмнага забеспячэння, якія хочуць звольніць агулам 69 чалавек. Гаворка ідзе і пра выдавецтва, якое звольніць 11 чалавек.
Такая вялікая колькасць групавых звальненняў можа быць вынікам хуткага росту кошту працоўнай сілы ў Польшчы, што падштурхоўвае міжнародныя карпарацыі шукаць больш танныя месцы дзеля сваёй дзейнасці.
нг