Інгрэдыенты
ласось – 500 г
французскае цеста
жаўток
аліўкі
лайм
Марынад
вінны воцат
імбір
аліўкавы алей
гваздзікі
мускатны арэх
соль
перац
Ян Сабескі быў гурманам, вялікім знаўцам апошніх кулінарных тэндэнцый і прыхільнікам французскай кухні. У ягонай бібліятэцы, сярод іншага, была кніга «Французскі кухар» - самая вядомая французская кулінарная кніга 17-га стагоддзя. У 1666 годзе, калі Сабескі быў яшчэ гетманам, ён параіў сваёй жонцы Марысеньцы напісаць у Парыж і заказаць «добрага кухара для нас, а пакуль прыняць любога, абы француза».
З кулінарнай кнігі мы выбралі рыбу, запечаную ў цесце.
Рэцэпт з кнігі «Французскі кухар»
«Вазьмі кавалак свежай рыбы, пакладзі яго ў посуд, залі вінным воцатам, дадай перац, імбір, соль, гваздзікі, мускатны арэх і вымочвай гэта шэсць гадзін, дадаўшы лімоны і аліўкі. Вазьмі пшанічную муку, аліўкавы алей, ваду, і замясі цеста, не занадта крутое.
Раскатай цеста, пакладзі рыбу, палі аліўкавым алеем, закрый цестам і сфармуй страву, як толькі хочаш ці ўмееш, а калі яна запячэцца, падай на стол у гарачым або халодным выглядзе».
Мы мадыфікавалі рэцэпт.
З імбіру, аліўкавага алею, гваздзікоў, мускатнага арэху, перцу, солі і віннага воцату робім марынад. А аліўкі і лайм маюць запякацца разам з рыбай у цесце. Марынуем каля 6 гадзін. Аліўкі рэжам так, каб яны змясціліся на ласосі. Кладзём рыбу на цеста, а бакі шмаруем жаўтком. Жаўток мае трымаць цеста і не даваць яму адслойвацца. На рыбу выкладаем аліўкі і лайм. Прыкрываем рыбу цестам, а рэшту цеста абразаем. Верх шмаруем жаўтком. Выпякаем каля 40 хвілін пры тэмпературы 180 градусаў.
Смачна есці!
Падрабязней пра тое, як прыгатаваць страву, раскажуць Кацярына Адамская і Валеры Саўко.
слухайце аўдыёфайл
Паводле праграмы "Гісторыя польскай кухні" вытворчасці Польскага тэлебачання