Прэм'ер-міністр Індыі Нарэндра Модзі ў нядзелю, 10 верасня, завяршыў двухдзённы саміт лідараў G20 у Нью-Дэлі і сімвалічна перадаў старшынства ў групе Бразіліі, дзе адбудзецца наступны саміт «Вялікай дваццаткі». Старшынства Бразіліі ў G20 афіцыйна пачнецца 1 снежня.
Прэмʼер-міністр Індыі прапанаваў правесці ў канцы лістапада «віртуальны саміт» для ацэнкі ходу рэалізацыі прапаноў і пажаданняў, выказаных лідарамі краін-удзельніц G20 у Нью-Дэлі.
У суботу, 9 верасня, лідары G20 выступілі супраць «выкарыстання сілы і пагрозы сілай для захопу тэрыторыі» і падкрэслілі, што «выкарыстанне або пагроза выкарыстання ядзернай зброі недапушчальныя», але наўпрост не асудзілі вайну Расіі супраць Украіны.
На саміце ў Нью-Дэлі Афрыканскі саюз быў уключаны ў якасці пастаяннага члена G20, каб зрабіць групу больш прадстаўнічай. Такім чынам, афрыканская арганізацыя з 55 членаў атрымала такі ж статус у G20, як і ЕС.
Таксама падчас саміту ў Нью-Дэлі сусветныя лідары абʼявілі аб заключэнні шматнацыянальнага пагаднення аб будаўніцтве чыгунак і партоў, якія злучаюць Блізкі Усход і Паўднёвую Азію.
iar/pap/ez