У аўторак беларускія СМІ паведамілі, што КДБ унесла ў «спіс экстрэмістаў» Радыё «Рацыя». Пры гэтым было адзначана, што з рэсурсам звязаны журналіст Яўген Валошын, які таксама стаў «экстрэмістам». Яўген – аўтар TouTube-каналаў «Пара!» і Радыё «Рацыя».
Мы звязаліся з ім і паразмаўлялі пра «спіс экстрэмістаў», сітуацыю і праблемы незалежных беларускіх СМІ, якія прымушаныя працаваць у замежжы, і пра тое, ці стварэнне «чорных спісаў» рэжымам прымушае людзей у Беларусі адмовіцца ад пошуку альтэрнатыўнай інфармацыі.
Яўген Валошын сказаў, што ўнясенне ў «спіс экстрэмістаў» не стала для яго нечаканасцю. «Гэта не стала для мяне сюрпрызам, з улікам таго, што ў «спісах экстрэмістаў» – усе запар. Там тысячы розных каналаў і рэсурсаў – усё, што магчыма, у тым ліку арганізацыі тыпу «ахова птушак» альбо «ахова звяроў» і гэтак далей», – сказаў журналіст.
Яўген лічыць, што ўнясенне нейкага СМІ ў спіс рэжыму аўтаматычна ўплывае на колькасць праглядаў рэсурсу, бо людзі звычайна баяцца чэрпаць інфармацыю з медыя, якое з’яўляецца «экстрэмістам».
«Гэта аказвае ўплыў, і мы гэта бачылі па прыкладзе так званых флагманскіх незалежных выданняў, калі ў іх колькасць падпісчыкаў падала з мільёна да паўмільёна і ніжэй», – зазначае Валошын.
«Я цяпер не ў Беларусі, але сітуацыю, якая там склалася, адчуваю, так бы мовіць, нюхам. Яна набліжаецца да таталітарнай, жудаснай кропкі. Людзі разумеюць, што выпадкова могуць праверыць іх тэлефоны, высачыць, і гэта прынясе грандыёзныя праблемы», – падкрэслівае журналіст.
Валошын кажа, што асноўнае пытанне незалежных беларускіх СМІ – гэта праблемы з фінансаваннем з Захаду, бо рэсурсы пайшлі ў сувязі з вайной ва Украіне і на праекты ў Расіі, а «на Беларусь не звяртаюць належнай увагі».
«І гэта вялікая праблема, таму што патэнцыял ёсць. Гэта магла б быць добрая інвестыцыя з гарантаваным вынікам. Але інвеставаць не спяшаюцца. Цяпер неабходна ўзмацняць медыя, уплыў на людзей у Беларусі, бо час перадваенны, час перад вайной. А час траціцца, і гэта сур’ёзная праблема», – зазначае журналіст.
размова цалкам – слухайце аўдыёфайл
З Яўгенам Валошыным размаўляе Валеры Саўко