Аўстрыец з аптычным прыцэлам спрабаваў незаконна трапіць у Беларусь, - паведамляе Свабода.
Ноччу 8 жніўня ў Камянецкім раёне Брэсцкай вобласці памежнікі заставы «Навасёлкі» заўважылі мужчыну, які ішоў з Польшчы ў Беларусь. Сабака памежнікаў узяў след, парушальніка затрымалі.
Выявілася, што парушальнік – 45-гадовы грамадзянін Аўстрыі. Ён заявіў, што нібыта «больш ня хоча заставацца ў сваёй краіне» і нібыта мае на мэце «пражыванне ў Беларусі».
У час дагляду ў яго знайшлі зменнае адзенне, тэлефон і планшэт, нож, кусачкі, нажоўку і аптычны прыцэл. Навошта мужчына нёс менавіта прыцэл, а не, напрыклад, бінокль, не ўдакладняецца.
Парушальніка пасля разбіральніцтва перадалі польскаму боку. Якая адказнасць чакае яго там, не паведамляецца.
яс