Люблінскае ваяводства Польшчы перадало дапамогу беларускім вайскоўцам, якія ваююць ва Украіне. Дапамога трапіць у добраахвотніцкія атрады палка імя Кастуся Каліноўскага. Агульны кошт дапамогі складае каля 70 тыс. злотых (15,5 тыс. еўра).
«Мы дасылаем ва Украіну гуманітарную дапамогу», – распавёў намеснік маршалэка Люблінскага ваяводства Збігнеў Вацяхоўскі:
-Зараз перадаём прадукты харчавання, а таксама два электрагенератары. Напярэдадні зімы гэтыя агрэгаты вельмі спатрэбяцца на фронце.
«Мы зараз змагаемся за свабодную Украіну, а потым будзем змагацца за свабодную Беларусь», – заявіў кіраўнік НАУ Павел Латушка падчас адпраўкі дапамогі на фронт:
- Беларусы ваююць ва ўкраінскіх часцях, таму што хочуць, каб Украіна была свабоднай і аднавіла сваю тэрытарыяльную цэласнасць. Але яны змагаюцца і за дэмакратычную, незалежную, еўрапейскую Беларусь, бо там таксама ідзе вайна - вайна дзяржавы з уласным народам – тысячы палітвязняў і катаванні кожны дзень.
Полк імя Каліноўскага быў створаны ў сакавіку 2022 года. Гэта добраахвотніцкі атрад, які ваюе ў складзе Узброеных сіл Украіны. У яго склад уваходзяць беларусы, якія хочуць дапамагчы абараніць Украіну ад расійскага ўварвання.
iar/эж