Каталіцкае «Радыё Марыя» пераехала ў сінагогу. «Нам тут рады», гавораць у рэдакцыі і працуюць над абсталяваннем новага часовага памяшкання — на гэта накіраваны сабраныя ахвяраванні, але збор дапамогі працягваецца, піша katolik.life.
Студыю каталіцкага «Радыё Марыя» ў Беларусі ўладкоўваюць на новым месцы. Нагадаем, рэдакцыі давялося з'ехаць з арэнднага памяшкання, дзе каманда працавала шмат гадоў. Пераезд быў тэрміновым — новы ўласнік пачаў рамонт раней запланаванага тэрміну, што перашкаджала працы радыё.
Знайсці новае, пакуль часовае памяшканне, дапамог выпадак. Аднак, па іроніі лёсу, выпадкова ўдзельнікі каманды заўважылі абвестку аб арэндзе памяшкання ў адной з сінагог Мінска.
Вырашылі патэлефанаваць — там не толькі не адмовілі, але і былі рады, даведаўшыся, што памяшканне патрэбна каталіцкаму медыя. Дамову замацавалі пячаткамі з выявамі Марыі і юдэйскай міноры, распавялі ў рэдакцыі.
«Радыё Марыя» працуе ў Беларусі праз інтэрнэт, бо ўлады адмовілі ў ліцэнзіі на вяшчанне ў FM-прасторы. Радыё працуе за ахвяраванні слухачоў, структуры Касцёла не фінансуюць працу радыё.
вх
