На сямейную хату Алеся Дзікавіцкага ў Пінску беларускі рэжым наклаў арышт. Гэта ўжо другі дом, які хочуць адабраць у былога намесніка тэлеканала «Белсат», зараз кіраўніка праекта Belarus Tomorrow.
«Даведаўся сёння, што арыштавалі яшчэ і дом у Пінску, які перадаў мне ў спадчыну бацька. Так, той самы на рагу вуліцаў Гогаля і Пралетарскай, у якім жыла ўся нашая вялікая сям’я, дзе мы з сябрамі праяўлялі свае аматарскія фотаздымкі і слухалі метал, дзе ў 1990-м мама пашыла першы ў маім жыцці бел-чырвона-белы сцяг, адкуль я 35 гадоў таму паехаў у інстытут, а яшчэ праз восем пайшоў «выкупаць нявесту» - будучую маю жонку. Той, у якім памерла мая бабуля», - паведаміў Алесь Дзікавіцкі ў Фэйсбуку.
Ён нагадаў, што дагэтуль не ведае, у чым яго абвінавачваюць, «за што маюць намер пазбавіць тых старых дамоў, якія маюць вельмі нязначную матэрыяльную вартасць».
«Веру ў тое, што ў новай Беларусі нерухомасць мне і іншым, у каго яе незаконна адбіраюць, будзе вернутая, а вінаватыя адкажуць у адпаведнасці з законам. І не таму, што я асабіста прагну помсты - не, а таму, што іначай той новай Беларусі - прававой дзяржавы мы ніколі не пабудуем», - напісаў Алесь Дзікавіцкі.
У мінулым годзе ўлады наклалі арышт на бацькоўскі дом журналіста ў вёсцы Мястковічы ў Пінскім раёне.
аз