Палітвязня Цімура Рызапура будуць судзіць за «злоснае непадпарадкаванне адміністрацыі калоніі»

У жніўні 2020 года палітвязня падстрэлілі гумавымі кулямі, калі ён вяртаўся з працы дадому, а пазней абвінавацілі ва ўдзеле ў беспарадках.

Цімур Рызапур

t.me/viasna96/скрыншот

Палітвязня Цімура Рызапура будуць судзіць за «злоснае непадпарадкаванне адміністрацыі калоніі», паведамляе «Вясна».

Мужчыну затрымалі 30 верасня 2020 года ў Брэсце. Увечары 10 жніўня, калі ён вяртаўся з працы дадому, яго падстрэлілі гумавымі кулямі пяць разоў: адзін раз – у жывот і чатыры разы – у ягадзіцу. Пазней яго абвінавацілі ва «ўдзеле ў масавых беспарадках» паводле ч. 2 арт. 293 КК. Цімура на волі чакаюць жонка і трое няпоўнагадовых дзяцей.Цімуру прызначылі 4,5 гады калоніі.

Тэрмін палітвязень спачатку адбываў ў наваполацкай калоніі. Адміністрацыя рэгулярна змяшчала яго ў штрафны ізалятар, а потым перавяла ў ПКТ. Пазней яму ўзмацнілі пакаранне і перавялі на турэмны рэжым.

Цяпер стала вядома, што 10 ліпеня ў судзе Ленінскага раёна Магілёва над ім распачнецца суд паводле ч. 2 арт. 411 КК (злоснае непадпарадкаванне адміністрацыі калоніі). Справу будзе разглядаць суддзя Наталля Панасенка.

аз