Міністры абароны Польшчы, Літвы, Латвіі і Эстоніі рэкамендуюць дэнансаваць Атаўскую канвенцыю.
«Наша рашэнне пасылае выразны сігнал: нашы краіны гатовыя і могуць выкарыстоўваць любыя неабходныя сродкі для абароны нашай тэрыторыі і свабоды», — гаворыцца ў заяве, апублікаванай на сайце Міністэрства нацыянальнай абароны.
Міністры заяўляюць, што, нягледзячы на выхад з Канвенцыі, яны застаюцца звязанымі міжнародным гуманітарным правам, уключаючы абарону грамадзянскага насельніцтва падчас узброеных канфліктаў.
«Нашы краіны будуць працягваць прытрымлівацца гэтых прынцыпаў, абараняючы бяспеку. Мы цэнім разуменне і падтрымку ўсіх нашых саюзнікаў і партнёраў, якія прызнаюць сур'ёзнасць пагроз бяспецы, з якімі мы сутыкаемся, і паважаюць нашы рашэнні ў гэтай сферы», — напісалі міністры абароны Польшчы і краін Балтыі.
У заяве яны адзначылі, што з моманту ратыфікацыі Канвенцыі аб забароне прымянення, назапашвання запасаў, вытворчасці і перадачы супрацьпяхотных мін і аб іх знішчэнні (Атаўскай канвенцыі) сітуацыя з бяспекай у рэгіёне значна пагоршылася.
Значна ўзраслі ваенныя пагрозы супраць дзяржаў-сябраў НАТА, якія мяжуюць з Расіяй і Беларуссю. У святле гэтай нестабільнай сітуацыі ў галіне бяспекі, адзначанай агрэсіяй Расіі і пастаяннай пагрозай, якую яна ўяўляе для еўраатлантычнай супольнасці, вельмі важна вызначыць усе меры, якія могуць паслужыць умацаванню нашых магчымасцей стрымлівання і абароны.
«Мы лічым, што ў цяперашняй абстаноўцы бяспекі вельмі важна даць нашым узброеным сілам гібкасць і магчымасць выбару адносна патэнцыйнага выкарыстання сучасных сістэм узбраення і рашэнняў для ўмацавання абароны ўсходняга флангу Альянсу, які знаходзіцца пад пагрозай», — напісалі міністры.
Па стане на травень 2019 года Атаўскую канвенцыю ратыфікавалі 164 краіны, уключаючы ўсе краіны Еўрапейскага саюза і большасць краін Афрыкі і Паўднёвай Амерыкі. Дзяржавы-падпісанты абавязваюцца не выкарыстоўваць, не распрацоўваць, не вырабляць, не набываць, не назапашваць, не захоўваць і не перадаваць супрацьпяхотныя міны, а таксама ўстрымлівацца ад падтрымкі, заахвочвання або схілення любым спосабам да ўдзелу ў дзейнасці, забароненай Канвенцыяй.
Канвенцыю не падпісалі ні Расія, ні ЗША, ні Кітай. Палажэнні дакумента не выконваюцца ні адным з бакоў вайны ва Украіне.
IAR/вх