Хохалаўская, Касцеліская даліны, Калатуўка, Паляна Капенец, Дарога пад Рэглямі (Chochołowska, Kościeliska doliny, Kalatówka, Polana Kopieniec, Droga pod Reglami) — гэта месцы ў Татрах, дзе на мяжы сакавіка і красавіка можна ўбачыць квітнеючыя крокусы.
Палюбавацца кветкамі можна таксама ў Закапанэ, Касьцеліску, Вітаве, Дзянішу.
Татранскі нацыянальны парк апублікаваў парады для турыстаў, якія плануюць наведаць Татры і Падгалле ў сезон крокусаў, каб палюбавацца дыванамі гэтых кветак на схілах гор. Цяпер з-за снегападу крокусы пакрытыя снегам.
Квітненне крокусаў з кожным годам прыцягвае ў Татры ўсё больш аматараў прыроды і прыгожых відаў. Самае папулярнае месца — паляна Хохалаўская (Polana Chochołowska), тут распускаецца безліч кветак.
«Апошнія гады мы маем справу з сапраўднай аблогай Хохалаўскай даліны ў выхадныя дні ў пік цвіцення крокусаў. Вынікам гэтага становяцца вялізныя заторы, чэргі на ўезд і рэкордныя натоўпы на сцежцы», — кажуць супрацоўнікі парку.
Яны прапануюць наведаць іншыя месцы, дзе таксама шмат крокусаў, але камфорту значна больш, бо няма тлуму.
Крокус ці шафран спіскі — гэта першы вястун вясны. З'яўляецца на мяжы сакавіка і красавіка, пакрываючы ліловымі кветкамі татранскія лугі, лясныя паляны, схілы гор. За форму бутона крокус называюць «маленькім цюльпанам».
Да слова, крокусы любяць лугі, дзе летам пасуцца авечкі, бо ім патрэбная ўгноеная глеба, багатая злучэннямі азоту.
Супрацоўнікі Татранскага нацыянальнага парку заклікаюць турыстаў не заходзіць на квітнеючыя лугі, каб не вытоптваць іх, а шпацыраваць па турыстычных сцежках.
Паводле РАР/вх