Турэцкая паліцыя затрымала найменш 1133 удзельнікаў пратэстаў супраць затрымання і наступнага арышту мэра Стамбула. Мясцовы чыноўнік знаходзіцца ў турме з учорашняга дня, сёння яго партыя афіцыйна абвясціла аб яго вылучэнні кандыдатам у прэзідэнты краіны ў 2028 годзе.
Новыя дадзеныя аб затрыманнях апублікавала МУС Турцыі. Паведамляецца, што сярод затрыманых ёсць асобы, «звязаныя з 12 тэрарыстычнымі групоўкамі».
Сярод затрыманых дзевяць журналістаў, якія асвятлялі акцыі пратэсту, паведаміў Саюз журналістаў Турцыі, апублікаваўшы іх імёны. Сярод арыштаваных рэпарцёры, фотакарэспандэнты і журналісты турэцкіх СМІ, а таксама рэпарцёр AFP Ясін Акгюль.
Арышт у Турцыі мэра Стамбула Экрэма Імамаглу быў звязаны з узмацненнем яго пазіцыі як галоўнага апанента прэзідэнта Эрдагана, лічыць Адам Міхальскі з Цэнтра ўсходніх даследаванняў. Эксперт па Турцыі падкрэслівае, што арышт адбыўся цяпер, каб не даць яму быць абраным кандыдатам ад Рэспубліканскай народнай партыі напярэдадні выбараў у 2028 годзе:
-Таму прасцей цяпер справіцца з палітычным хаосам, чым чакаць да даты выбараў, бо тады гэта будзе цяжэй апанаваць. Пра Імамаглу людзі раней ці пазней забудуць, будзе новы кандыдат, час загоіць раны і ўлады змогуць вярнуцца да традыцыйнай палітыкі.
З моманту арышту мэра Стамбула Экрэма Імамаглу ў гарадах Турцыі штодня адбываюцца акцыі пратэсту.
Нягледзячы на абвінавачанні ў карупцыі, палітык быў афіцыйна вылучаны кандыдатам у прэзідэнты краіны ад сваёй Рэспубліканскай народнай партыі.
ав