Расійскія сілы спрабуюць заблакаваць Чарнігаў на поўначы Украіны і працягваюць канцэнтраваць наступальныя сілы ў Данецкай вобласці з намерам захапіць, у тым ліку, Марыупаль, паведаміў у нядзелю Генштаб Узброеных сіл Украіны.
На паўночным кірунку фронту працягваліся абстрэлы жылых мікрараёнаў Чарнігава, Іванаўкі і Нежына. Таксама пад абстрэлам былі жылыя мікрараёны Кіева і яго прыгарады. Агрэсар пачаў перагрупоўку войскаў, перамясціўшы некалькі падраздзяленняў у раён Чарнобыля і далей у Беларусь для аднаўлення баяздольнасці. Магчыма, што спроба нападу на сталіцу з паўночнага захаду будзе адноўлена.
На Сумскім і Харкаўскім напрамках фронту расійскія войскі не вялі актыўных наступальных дзеянняў. У напрамку Славянска расійскія войскі спрабуюць умацавацца свае пазіцыі ў раёне Каменкі, Сынічэна і Сухой Каменкі.
На данецкім напрамку расіяне працягваюць канцэнтрацыю сваіх наступальных сіл з мэтай поўнага захопу Данецкай і Луганскай абласцей. Галоўная мэта – узяць пад кантроль Папасную і Рубежнае і захапіць Марыупаль.
Мэр горада Вадзім Бойчанка заявіў у суботу ўвечары ў інтэрв'ю агенцтву «Уніан», што мэта ворага адна – сцерці Марыупаль з твару зямлі разам з усімі яго жыхарамі. Па дадзеных муніцыпальных уладаў, у горадзе загінулі 2 187 мірных жыхароў. З 540 тысяч жыхароў Марыупаля пакуль была эвакуіраваная палова.
У Генштабе Узброеных сіл Украіны падкрэсліваюць, што расійскія жаўнеры працягваюць тэрарызаваць і запалохваць мірных жыхароў на акупаваных тэрыторыях, у тым ліку яны рабуюць і выкрадаюць людзей.
PAP/аз
