Еўракамісія заявіла, што ЕС гатовы прыпыніць транзіт расійскага газу праз Украіну. Газ перастаў паступаць а 7-й раніцы па кіеўскім часе.
«Еўрапейская газавая інфраструктура дастаткова гнуткая, каб мець магчымасць дастаўляць газ з-за межаў Расіі ў краіны Цэнтральнай і Усходняй Еўропы па альтэрнатыўных маршрутах. Інфраструктура ўзмоцнена новымі магутнасцямі па імпарту звадкаванага газу з 2022 года», — сказаў прадстаўнік Еўракамісіі.
Украінскія ўлады не працягнулі транзітнае пагадненне з расійскім «Газпрамам». Украінцы патлумачылі гэта тым, што не жадаюць даць агрэсару магчымасць зарабіць дзеля вядзення вайны.
Пагадненне аб транзіце газу паміж расійскім «Газпрамам» і ўкраінскім «Нафтагазам» апошні раз падаўжалася ў снежні 2019 года і выконвалася, нягледзячы на поўнамаштабную расійскую агрэсію. Украінскія ўлады даўно заяўляюць, што больш не будуць яго працягваць.
«Мы не будзем працягваць транзіт расійскага газу. Мы не дамо магчымасці зарабіць мільярды на нашай крыві», — заявіў некалькі тыдняў таму прэзідэнт Уладзімір Зяленскі. РФ зарабляла на транзіце каля 6,5 млрд долараў у год.
iar/pap/эж