Слухайце размову ў далучаным файле!
Беларуская школа пры Цэнтры беларускай салідарнасці ў Варшаве (ЦБС) – праект дадатковай адукацыі. Апроч заняткаў па беларускай мове, у школе праводзяць шмат развіваючых і творчых заняткаў. Усё гэта – бясплатна. Праект разлічаны на адаптацыю дзяцей да жыцця на эміграцыі і польскамоўным асяроддзі, расказвае каардынатарка школы ЦБС Ганна Ермакова:
– Бежанцы з Украіны ўцякаюць ад вайны ні з чым, і бежанцы з Беларусі ўцякаюць ад вайны і таксама ні з чым – бяруць квіток у адзін канец. Дзеці прыязджаюць з не вельмі добрымі пачуццямі. Але. Колькі часу займае адаптацыя? У некага гадзіна, у некага дзве. Гэта дзіўна гучыць, але калі дзіця бачыць, што тут бяспечна, яны таксама заўсёды бачаць, што мы ім радыя.
Цяпер у Цэнтры беларускай салідарнасці прыкладна 15 працэнтаў – гэта дзеці з Украіны, астатнія – з Беларусі.
Ганна Ермакова падкрэслівае, што канфліктаў паміж дзецьмі з прычыны нацыянальнасці не ўзнікае:
– Дзеці наша будучыня, і мы хочам паказаць уласным прыкладам, што ўжо сёння трэба ствараць адносіны ў будучыні паміж нашымі краінамі. Дзеці з Беларусі бачаць дзяцей з Украіны, яны кантактуюць, з задавальненнем гуляюць. Ніякага булінгу не было ніколі. Ёсць вялікая зацікаўленасць сярод дзяцей, яны абменьваюцца досведам, на жаль, ён не ва ўсіх добры, з некаторых гісторый дзеці могуць быць і шакаваныя. Але такі зараз час на жаль.
За ўвесь час працы школы ў ёй прайшлі навучанне больш за тысячу трыста дзяцей. Заняткі арганізуюць адпаведна да патрэб дзяцей. Напрыклад, ёсць заняткі для малодшых дзяцей 6-8 год па арттэрапіі, у мінулым годзе праводзілі дадатковыя заняткі па матэматыцы для падрыхтоўкі дзяцей да здачы экзаменаў у 8-ым класе ў Польшчы.
– Дзеці здалі 80-90+ балаў. Мы гэтым вельмі ганарымся. Са слоў бацькоў, калі дзеці выходзілі з экзамену, яны казалі: «Супер! Мы гэта ўжо бачылі, праходзілі, ведаем!».
Цяпер набраная наступная група на заняткі па падрыхтоўцы да экзамену па матэматыцы, англійскай мове, а таксама малюнку – гэта для паступлення ва ўстановы адукацыі з мастацкім ухілам. Агулам заняткі праходзяць больш чым па дзесяці кірунках, усе яны бясплатныя.
Беларуская школа пры Цэнтры беларускай салідарнасці ў Варшаве пад кіраўніцтвам Хэлены Нядзьвецкай падтрымлівае дзяцей беларусаў на новым этапе жыцця
Каардынатарка школы ЦБС Ганна Ермакова падкрэслівае, што праекты для мігрантаў з Беларусі і Украіны застаюцца актуальнымі, бо сітуацыя ў рэгіёне не палепшылася.
– На жаль, сітуацыя ў Беларусі не змяняецца. Працягваецца гвалт і над бацькамі, і над дзецьмі: прыходзіць міліцыя і затрымлівае бацькоў, б’е іх на вачах у дзяцей. Шмат каго затрымліваюць, забіраюць, скручваюць, бывае гэта і пасярод ночы. І гэта ўсё адбываецца на вачах у дзяцей. Таму добра, калі яны могуць выехаць, без нічога. Дзеці пасля такіх сітуацый прыходзяць да нас з дрыжачымі рукамі. Бывае, дзіця прыходзіць да нас пасля такога і баіцца кожнага гучнага гуку, а праз нейкі час пачынае гуляць з іншымі дзецьмі, забывае, што здарылася. Калі бацькі бачаць, што ў нас тут дзіця спакойнае, яны таксама застаюцца, бо ім спакойна і ўтульна. У нас вельмі багата такіх прыкладаў, і гэта таксама адаптацыя для бацькоў, хаця мы дзіцячы цэнтр, дзіцячая школа.
Водгук дзіцяці на працу Школы ЦБС.
Пра патрэбу ў цэнтрах, якія б падтрымлівалі мігрантаў з Беларусі, Украіны, гаворыць і грамадская актывістка Алена Талстая, яна таксама знаходзіцца ў вымушанай эміграцыі ў Польшчы:
– Без лаяльнага стаўлення і падтрымкі польскай дзяржавы наўрадці атрымалася б у людзей хутка сацыялізавацца ў польскім грамадстве. Найперш патрэбная прававая падтрымка, каб людзі разумелі куды прыходзіць. Падчас дня палітвязня маладыя людзі, якія толькі апынуліся ў Польшчы, пыталіся, куды можна звярнуцца, каб зразумець, што ад нас патрабуюць? І тут пытанне не толькі да польскай дзяржавы, але і да структур дыяспар.
Алена Талстая кажа, што важныя моўныя курсы, бо без ведання мовы немагчыма ўладкавацца на працу, каб забяспечваць сябе, развівацца. Атрымліваецца замкнёнае кола: няма ведання мовы, няма працы і грошай, няма магчымасці вучыцца ды інтэгравацца ў грамадства.
Другі балючы пункт – сітуацыя з пенсіямі. У Польшчу, збягаючы ад пагрозы турмы, выехала даволі шмат людзей у сталым узросце.
– Атрымліваецца, што чалавек у сталым узросце, які ўжо не можа працаваць, апынецца на вуліцы. Хацелася б проста атрымаць тлумачэнне, што можна зрабіць. Я асабіста сустракаюся з разгубленасцю людзей сталага ўзросту, не ўсіх могуць падтрымліваць дзеці, — падкрэслівае Алена Талстая.
Паводле даследавання агенцтва Picodi, агульная колькасць беларусаў, якія пражываюць у Польшчы ў пачатку 2024 года, ацэньваецца ў 310 тысяч чалавек. За мінулы 2023 год у Польшчу пераехала 60 тысяч беларусаў; за апошнія 5 гадоў (з 2019 года) колькасць беларусаў у Польшчы вырасла ў 6,5 разоў.
20 чэрвеня — Міжнародны дзень уцекачоў.
вх
