Gazeta Wyborcza вяртаецца да тэмы хатняга задання. Роўна год таму ў базавых школах Польшчы ўвялі абмежаванні – нельга задаваць абавязковую дамашнюю работу, нельга выстаўляць за яе адзнакі. Міністарка адукацыі Барбара Навацка (Barbara Nowacka) заявіла, што будзе праведзеная праверка, ці рэформа прыносіць вучням больш карысці, ці шкоды. Міністарка прызнала, што рэформа не была ўдачнай з-за адсутнасці кантролю над яе ўвядзеннем, - піша каментатарка выдання Магдалена Келер (Magdalena Keller).
Польская школа жыве паводле прынцыпу: “Што хачу, тое і раблю”. Прыватныя ўстановы ўводзяць уласныя правілы, а публічныя часта парушаюць устаноўленыя прынцыпы. Так выглядае сітуацыя і з хатнім заданнем, частка школ цалкам ад яго адмовілася, частка задае, як і раней, але не ставіць адзнак, а іншыя проста некалькі разоў у тыдзень праводзяць кантрольныя работы. Адсутнасць дамашняй работы павінна была аблегчыць школьнікам жыццё, каб яны больш актыўна праводзілі свабодны час, а аказалася, што яны сядзяць над падручнікамі яшчэ больш, паколькі вучацца да кантрольных.
Такім чынам, піша аўтарка, адсутнасць хатняга задання не аздаравіла сістэмы. Яе цалкам неабходна мяняць. Праграма надалей празмерна раздзьмутая, вучні шмат вучаць на памяць, не ўмеюць крытычна падыходзіць да тэмы, аддзяліць факты ад фэйкаў. Хатняе заданне настаўнікі задаюць нярэдка з-за таго, што не паспяваюць прайсці матэрыял на ўроках. Акрамя гэтага, школа не здольная навучыць дзяцей сістэматычна працаваць самастойна. Не ўмее матываваць іх праз пахвалы, а не крытыку.
Некаторыя бацькі кажуць, што ў выніку адсутнасці дамашняй работы дзеці больш часу праводзяць за камп’ютарам. Хатняе заданне было зручна для бацькоў, якія хацелі кантраляваць, ці іх дзіця засвойвае школьны матэрыял.
нг