Як эксперты, так і самі ўкраінскія вайскоўцы ўпэўненыя, што прэзідэнцкія выбары ў ЗША могуць мець вырашальны ўплыў на вайну ва Украіне і яе магчымае завяршэнне. Нягледзячы на тое, што Дональд Трамп неаднаразова крытыкаваў дапамогу ваюючай Украіне, многія ўкраінскія салдаты спадзяюцца на перамогу рэспубліканцаў на выбарах.
Незалежна ад таго, хто пераможа на выбарах, можна чакаць змены падыходу да вайны ва Украіне, якая працягваецца, і маштабу дапамогі, якую ЗША аказваюць гэтай краіне.
Доктар Войцех Лорэнц з Польскага інстытуту міжнародных спраў у інтэрв'ю IAR адзначыў, што і дэмакраты, і рэспубліканцы, верагодна, будуць спрабаваць дамаўляцца з Расіяй. Аднак тое, як могуць выглядаць магчымыя мірныя перамовы, залежыць ад таго, хто пераможа ў барацьбе за Белы дом:
- Верагодна, у выпадку Дональда Трампа мы будзем мець дачыненне з адкрытым выкручваннем рук украінскаму боку. Словы прыхільнікаў Трампа сведчаць пра іх прарасійскую пазіцыю. З боку адміністрацыі Камалы Харыс таксама быў бы ціск на ўкраінскі бок, але і быў бы ціск і на Расію, пагрозы аб пагаршэнні яе сітуацыі.
Эксперт таксама падкрэслівае, што Дональд Трамп — больш непрадказальны кандыдат. Невядома, ці прывядуць у выпадку перамогі яго заявы аб хуткім спыненні вайны ва Украіне да поўнага блакавання дапамогі гэтай краіне з боку ЗША. Ці, наадварот, Трамп павялічыць дапамогу, каб любыя мірныя перамовы можна было весці з пазіцыі сілы.
Заўтра амерыканцы вырашаць, ці стане прэзідэнтам кандыдат ад дэмакратаў Камала Харыс, ці вернецца да ўлады Дональд Трамп, які прадстаўляе рэспубліканцаў. Пакуль у ЗША ідуць выбары, сітуацыя на фронце шмат дзе для Украіны крытычная. Расіяне паспяхова вядуць наступ на Данбасе, дзе неўзабаве, верагодна, пачнуць штурм стратэгічна важнага Пакроўска. Масква таксама працягвае бамбіць украінскія гарады і спрабуе знішчыць украінскую важную інфраструктуру, спадзеючыся, што чарговая зіма прымусіць абаронцаў здацца.
ав