Значная колькасць паўночнакарэйскіх вайскоўцаў загінула падчас першых баёў у вайне супраць Украіны разам з расійскімі войскамі, паведамляе NYT.
Гэтую інфармацыю распаўсюдзіла газета «NYT» са спасылкай на высокапастаўленых украінскіх і амерыканскіх чыноўнікаў, якія пажадалі застацца неназванымі.
Па словах украінскага чыноўніка, сутыкненне было «абмежаваным» і, верагодна, мела на мэце выявіць слабыя месцы ва ўкраінскіх лініях, а карэйцы ўваходзілі ў склад 810-й асобнай гвардзейскай брыгады марской пяхоты. Ён не ўдакладніў, калі пачаліся баі і колькі вайскоўцаў загінула.
Амерыканскі чыноўнік, якога цытуе NYT, заявіў, што загінула «значная» колькасць паўночнакарэйскіх салдат.
Інфармацыю аб першых сутычках украінскіх войск з паўночнакарэйскімі вайскоўцамі пацвердзіў міністр абароны Украіны Рустэм Умераў. У інтэрв'ю паўднёвакарэйскай тэлекампаніі KBS, ён сказаў, што адбылося «невялікае» сутыкненне, але адмовіўся паведаміць падрабязнасці пра час і месца сутычкі.
Прэзідэнт Украіны Уладзімір Зяленскі ў сваёй вячэрняй прамове ў аўторак заявіў, што «першыя баі з паўночнакарэйскімі салдатамі адкрываюць новую старонку нестабільнасці ў свеце». Пры гэтым ён не стаў раскрываць падрабязнасці.
У канцы кастрычніка міністр абароны ЗША Лойд Осцін заявіў, што ў Расіі знаходзяцца 10 тысяч вайскоўцаў з Паўночнай Карэі, у тым ліку 8000 у Курскай вобласці, дзе ў жніўні гэтага года пачалася наступ Украіны. У панядзелак паведамлялася, што, паводле звестак украінскай ваеннай выведкі (ГУР), у Курскай вобласці ўжо 11 тысяч паўночнакарэйцаў.
ПР/юл