Падчас свайго звароту да Кангрэса ЗША ў аўторак увечары прэзідэнт Дональд Трамп заявіў, што атрымаў ліст ад прэзідэнта Украіны Уладзіміра Зяленскага.
Паводле прэзідэнта ЗША, у гэтым лісце ўкраінскі лідар паведаміў, што Кіеў «гатовы сесці за стол перамоваў» і што «ніхто не хоча міру больш, чым Украіна».
Амерыканскі лідар дадаў, што ў лісце Зяленскі выказаў удзячнасць ЗША за падтрымку і паведаміў аб гатоўнасці падпісаць пагадненне па рэдказямельных мінералах. Падпісанне сарвалася ў мінулую пятніцу, 28 лютага, пасля сваркі ў Белым доме.
«Паралельна ў нас былі сур'ёзныя перагаворы з Расіяй, і мы атрымалі моцныя сігналы, што яны гатовы да міру», — дадаў прэзідэнт ЗША.
«Я нястомна працую, каб пакласці канец жорсткаму канфлікту ва Украіне. Мільёны ўкраінцаў і расіянаў былі дарэмна забітыя ці параненыя ў гэтым жахлівым і жорсткім канфлікце, канца якому не відаць. Злучаныя Штаты накіравалі сотні мільярдаў долараў на падтрымку абароны Украіны. Між тым, Еўропа, на жаль, выдаткавала больш грошай на куплю расійскай нафты і газу, чым на абарону Украіны — значна больш! І Байдэн вылучыў на гэтую барацьбу больш грошай, чым выдаткавала Еўропа». — перакананы Дональд Трамп.
Аглядальнікі адзначаюць, што ў сваёй прамове перад Кангрэсам прэзідэнт ЗША ніяк не пракаментаваў прыпыненне ваеннай дапамогі Украіне.
PAP/VOA/эж