У канцы сакавіка скончыўся тэрмін, на які быў заключаны кантракт па праектаванні атамнай электрастанцыі на поўначы Польшчы - піша Rzeczpospolita. За ўвесь час перамоў паміж кампаніяй Польскія атамныя электрастанцыі і амерыканскім кансорцыумам Westinghouse-Bechtel не было падпісана ніводнага новага кантракту або пераходнага пагаднення.
Праўда, адсутнасць дамовы не азначае, што праца па будаўніцтве АЭС у Польшчы будзе прыпынена. «Праца працягваецца. Мы пастаянна вядзём перамовы. Наша супрацоўніцтва працягваецца», — супакойвае Войцех Врохна (Wojciech Wrochna), упаўнаважаны ўрада па стратэгічнай энергетычнай інфраструктуры. Бакі абмяркоўваюць дэталі, наконт якіх пакуль што няма поўнай згоды. Гэта пытанне адказнасці за праект і спосаб аплаты праведзеных работ.
Амерыканцы хацелі б як мага хутчэй падпісаць рабочую дамову, але палякі імкнуцца змяніць частку палажэнняў у гэтым кантракце. Іншая справа – перамовы з Еўрапейскай камісіяй, каб яна дала згоду на фінансавую падтрымку будаўніцтва АЭС з дзяржаўнага бюджэту Польшчы. Гаворка ідзе пра 60 мільярдаў злотых.
Каментатар выдання Марыюш Янік (Mariusz Janik) задаецца пытаннем, ці палякі павінны будаваць АЭС у супрацы з амерыканцамі, калі палітыка ЗША пад уладай Дональда Трампа так дыяметральна змянілася? Можа, лепш было б падтрымліваць еўрапейскую атамную прамысловасць, якая мае багаты досвед у будаўніцтве і эксплуатацыі АЭС.
нг