Міністр замежных спраў Германіі Анналена Бэрбок, якая знаходзіцца з візітам ва ўкраінскай сталіцы Кіеве, у аўторак выключыла магчымасць аднаўлення праекта газаправода «Паўночны паток-2» (Nord Stream-2), праз які, як планавалася, пастаўлялі б расійскі газ у Еўропу.
«Няправільнае рашэнне адносна Nord Stream-2 каштавала нам вельмі дорага», — сказала Бэрбок на прэс-канферэнцыі з прэзідэнтам Украіны Уладзімірам Зяленскім.
«Мы заплацілі за гэта мільярды еўра, таму цалкам відавочна, што гэты трубаправод не можа быць адноўлены, — дадала Бэрбок. — Гэта рашэнне, якое знаходзіцца ў руках немцаў, гэта рашэнне было прынята папярэднім федэральным урадам сацыял-дэмакратычнага канцлера Олафа Шольца ў поўнай згодзе з кансерватыўнай партыяй, якая перамагла на парламенцкіх выбарах у канцы лютага».
Транспарціроўка газу па Nord Stream была цалкам прыпыненая Расіяй у жніўні 2022 года. Пытанне аб аднаўленні працы газаправода зноў паўстала ў кантэксце нядаўніх перамоваў Вашынгтона з Крамлём аб вайне ва Украіне. Раней паведамлялася, што Nord Stream-2 стане часткай амерыкана-расійскага пагаднення, а газаправод адновіцца з удзелам амерыканскага інвестара.
У верасні 2022 года газаправоды Nord Stream-1 і Nord Stream-2 атрымалі пашкоджанні ў выніку двух выбухаў. Аднак адзін з трубаправодаў Nord Stream-2 застаўся цэлым і быў прыдатны для эксплуатацыі.
Перамовы з ЗША аб аднаўленні паставак газу па Nord Stream
26 сакавіка міністр замежных спраў Расіі Сяргей Лаўроў абвясціў пра перамовы паміж Масквой і Вашынгтонам аб аднаўленні паставак прыроднага газу ў Еўропу па газаправодзе Nord Stream. «Цяпер, вядома, ёсць рознагалоссі, але ці толькі ЗША і Расія зацікаўленыя ў аднаўленні нармальных энергазабеспячэння Еўропы?» — сказаў кіраўнік расійскай дыпламатыі. «Вядуцца размовы пра Nord Stream. Безумоўна, будзе цікава, калі амерыканцы выкарыстаюць свой уплыў на Еўропу і прымусяць яе не адмаўляцца ад расійскага газу», — заявіў Лаўроў у эфіры расійскага дзяржаўнага тэлебачання.
У Германіі, дзе пасля двух гадоў рэцэсіі эканоміка ўсё яшчэ слабая, гучалі галасы, што праект трэба перагледзець.
«Мы чуем, што некаторыя людзі спекулююць на гэтай тэме, але гэта не вядучыя нямецкія палітыкі, не яны прымаюць ключавыя эканамічныя і геастратэгічныя рашэнні, — растлумачыла Бэрбок. — Еўрапейская бяспека і эканамічная бяспека цесна звязаны».
Паводле forsal.pl/вх