Польскі Інстытут Ordo Iuris і венгерскія інстытуты, якія фінансуюцца Віктарам Орбанам, спрабуюць пераканаць атачэнне прэзідэнта ЗША, што Трамп мусіць займацца ўнутранымі справамі Еўрасаюза, піша інтэрнэт-выданне OKO.PRESS.
Размова ідзе пра глыбокае ўмяшанне і разбурэнне Еўрасаюза, якім мы яго ведаем, зазначае партал.
11 сакавіка ў Вашынгтоне адбылася сустрэча прадстаўнікоў ультракаталіцкага Ordo Iuris і венгерскага Collegium Mathiasa Corvinusa з амерыканскім аналітычным цэнтрам Heritage Foundation. Еўрапейцы прадставілі амерыканцам план «Вялікай перазагрузкі» Еўрасаюза.
Heritage Foundation — гэта арганізацыя, якая аказвае істотны ўплыў на палітыку Дональда Трампа. Яе супрацоўнікі напісалі неафіцыйную перадвыбарчую праграму Трампа «Праект 2025», і яна, відавочна, натхнёная палітыкай Орбана.
Heritage Foundation ужо некалькі гадоў супрацоўнічае з венгерскімі ўстановамі, якія фінансуе ўрад Орбана. Гэты аналітычны цэнтр стаў папулярызатарам «орбанізму» ў амерыканскіх правых колах, зазначае OKO.PRESS.
Віктар Орбан нарошчваў уплыў у амерыканскіх правых колах прынамсі з 2022 года і плаціў тысячы долараў некаторым амерыканскім журналістам і навукоўцам за лаяльныя артыкулы. А цяпер гэты фонд венгры ў супрацоўніцтве з польскім Ordo Iuris прыцягваюць да плана дэмантажу Еўрасаюза.
План «Вялікай перазагрузкі» Еўрасаюза
Праект «Вялікая перазагрузка» змяшчае два сцэнарыі рэформаў Еўрасаюза, накіраваных на «аднаўленне дэмакратыі і суверэнітэту нацыянальных дзяржаў». Ужо ў гэтай заяве хаваецца сцвярджэнне, што ЕС недэмакратычны, а яго дзяржавы-члены не з'яўляюцца суверэннымі.
Прадугдеджана істотнае скарачэнне паўнамоцтваў тых інстытутаў ЕС, якія правяраюць, ці выконваюць дзяржавы правілы, прынятыя ва ўсім Еўрасаюзе. Гаворка ідзе галоўным чынам пра Суд Еўрапейскага Саюза і Еўракамісію. Гэтыя структуры ўскладняюць Віктару Орбану хуткае пераўтварэнне Венгрыі ў аўтарытарную дзяржаву. Нездарма аўтары плана вырашылі іх значна аслабіць.
Праект «Вялікая перазагрузка» робіць стаўку на механізмы, накіраваныя на тое, каб не дазволіць інстытутам ЕС ўмешвацца ў прававыя сістэмы дзяржаў-членаў. Ordo Iuris разам з венгерскімі аднадумцамі таксама прапануюць змяніць назву "Еўрасаюз" на "Еўрапейская супольнасць нацыяў".
Уся «рэформа» зводзіцца да таго, каб «выбіць зубы» Саюзу, які стаў бы не моцнай міждзяржаўнай арганізацыяй, а друзлым аб'яднаннем дзяржаў і не меў магчымасці весці супольнай абарончай палітыкі, сцвярджаецца ў артыкуле OKO.PRESS.
яс