Польская кампанія «Дэтэктыўнае агенцтва «Рэкс» (Agencja detektywistyczna «Reks») была зарэгістраваная 24 сакавіка 2025 года. Яе заснавалі былыя беларускія сілавікі і ўдзельнікі ініцыятывы BYPOL Аляксандр Азараў і Станіслаў Лупаносаў. Такія дадзеныя змяшчаюцца ў афіцыйным польскім судовым рэестры арганізацый, паведамляе Reform.news.
Мяркуючы па інфармацыі з рэестру, Азараў з'яўляецца старшынёй праўлення. У кіраўніцтва таксама ўваходзяць Станіслаў Лупаносаў і Таццяна Азарава.
У дакументах указана, што фірма можа займацца дэтэктыўнымі і ахоўнымі паслугамі, продажам камп'ютараў і праграмнага забеспячэння, інфармацыйнымі паслугамі, паслугамі, звязанымі з кіна- і аўдыёзапісамі, уборкай будынкаў, арэндай рознага абсталявання і тэхнікі, пракатам рэкрэацыйнага інвентару.
Нагадаем, Азараў узначальваў аб'яднанне сілавікоў Беларусі BYPOL, якія выступілі супраць рэжыму Лукашэнкі. У чэрвені 2023 года ў арганізацыі адбыўся раскол і частка ўдзельнікаў стварыла альтэрнатыўную структуру BELPOL, а Азараў застаўся кіраваць іншай часткай пад ранейшай назвай.
Да жніўня 2023 года Азараў з'яўляўся прадстаўніком Аб’яднанага пераходнага кабінету па аднаўленні правапарадку. Каардынацыйная рада не ўзгадніла яго кандыдатуру, і Святлана Ціханоўская адхіліла яго ад пасады.
У маі 2024 года падпісчыкі чат-бота @plan_peramoga_bot у «Тэлеграме» атрымалі паведамленне з заклікам прыняць удзел у выбарах у Каардынацыйную раду і галасаваць за спіс «Закон i правапарадак» на чале з Аляксандрам Азаравым. За гэтую рассылку спіс «Закон i правапарадак» быў адхілены ад выбараў у КР.
вс