Прэзідэнт Анджэй Дуда падзякаваў дыпламатам, якія ўдзельнічаюць у эвакуацыі палякаў з тэрыторыі, ахопленай канфліктам на Блізкім Усходзе. Сёння ў Польшчы адзначаецца Дзень дыпламатаў, супрацоўнікаў Міністэрства замежных справаў і дыпламатычных прадстаўніцтваў па ўсім свеце.
Падчас цырымоніі ў прэзідэнцкім палацы Анджэй Дуда падзякаваў за мужнасць, самаадданасць, прафесіяналізм польскім дыпламатам, якія ўдзельнічаюць у эвакуацыі польскіх грамадзян з Сектара Газа.
Прэзідэнт Дуда таксама запэўніў, што будзе імкнуцца падтрымліваць добрыя адносіны з ЗША. Паводле яго слоў, ён будзе працаваць над умацаваннем адносін з Вашынгтонам. Ён дадаў, што з яго пункту гледжання не важна, хто будзе прэзідэнтам ЗША. «Важна толькі тое, каб прэзідэнт Польшчы меў найлепшыя адносіны з прэзідэнтам ЗША і са Злучанымі Штатамі, таму што гэта ў інтарэсах Польшчы», – сказаў ён.
Анджэй Дуда таксама сказаў, што перад абліччам выклікаў сучаснага свету Польшча павінна развіваць супрацу са сваімі суседзямі, у тым ліку ў рамках Вышаградскай групы.
- Вышаградская група – Польшча, Чэхія, Славакія, Вугоршчына – павінны прадстаўляць адзіную, прадуманую пазіцыю, перш за ўсё па пытаннях, якія датычаць Еўропы. Неабходна таксама развіваць супрацу ў рамках Веймарскага трыкутніка. Мы – вялікая еўрапейская дзяржава, якая з'яўляецца элементам восі Усход – Захад, таму супраца ў рамках Веймарскага трыкутніка, несумненна, зʼяўляецца важнай галіной.
Прэзідэнт таксама паведаміў, што ў наступным годзе будзе працаваць над паглыбленнем супрацы ў рамках рэгіянальных ініцыятыў з суседнімі з Польшчай краінамі. Ён падкрэсліў, што асноўнымі ініцыятывамі, якія ён хацеў бы развіваць, зʼяўляюцца Бухарэсцкая дзявятка і Ініцыятыва трох мораў.
Дзень дыпламатычнай службы адзначаецца ў памяць аб адпраўленні Юзэфам Пілсудскім 16 лістапада 1918 года першай дыпламатычнай тэлеграмы кіраўнікам дзяржаў свету, у якой паведамлялася аб стварэнні незалежнай польскай дзяржавы.
IAR/нг