За яго згасаннем і смерцю сачыў увесь свет. У апошні шлях яго праводзілі мільёны людзей. 20 гадоў таму памёр Ян Павел ІІ, Папа Рымскі, які змяніў ход гісторыі.
У 21.37 Рэната Буцанеці абвясціў смерць Папы. Вестка пра смерць Яна Паўла ІІ кранула людзей ва ўсім свеце. У Польшчы адчынялі касцёлы, званілі званы, на плошчах гарадоў збіралася шмат людзей. У гэты час Анна Сладычка (Anna Słodyczka) малілася ў Закапанэ. Яна выдатна памятае той вечар.
- Людзі стаялі ў вялікай цішыні і задуменні, маліліся. І раптам пазваніў тэлефон – 21.37. Хтосьці хутка выключыў мабільнік. І праз хвілінку выйшаў пробашч і сказаў, што Святы Айцец памёр. Гэтая інфармацыя быццам бы зачаравала людзей, ніхто нічога не сказаў, было чуваць толькі дыханне людзей. У гэтую ноч немагчыма было заснуць, было праліта шмат слёз.
У Рыме і Ватыкане адбываюцца ўрачыстасці з нагоды 20-годдзя смерці святога Яна Паўла ІІ. Сёння ў ватыканскай базіліцы адбудзецца ўрачыстая імша, а на плошчы святога Пятра будзе арганізавана малітоўнае чуванне.
Імша ў базіліцы пачнецца ў 15.00. і будзе транслявацца ватыканскімі СМІ. Імшу будзе цэлебраваць Дзяржсакратар Ватыкана кардынал П’етра Паралін. Вечарам малітоўнае чуванне ўзначаліць Мітрапаліт Гданьскі і старшыня Канферэнцыі Епіскапату Польшчы арцыбіскуп Тадэвуш Войда. У тэксце разважанняў будуць выкарыстаны фрагменты прамовы Яна Паўла ІІ, якая прагучала ў 2002 годзе ў Таронта падчас Сусветных дзён моладзі.
Заўтра ў зале пры польскім касцёле святога Станіслава адбудзецца ўрачыстае адкрыццё выставы фотамастака Гжэгажа Галонзкі «Ад'езд Вялікага Папы». У суботу ў базіліцы святога Паўла за мурамі адбудзецца канцэрт «Падкарпацце слядамі Яна Паўла ІІ сярод традыцыі, культуры і музыкі».
Урачыстасці, прымеркаваныя да гадавіны смерці папы Рымскага, адбудуцца таксама ў Польшчы. У Кракаве ў касцёле святога Яна Паўла ІІ арцыбіскуп Марэк Ендрашэўскі ўзначаліць урачыстую Эўхарыстыю, пасля якой пройдзе Крыжовы шлях.
Ян Павел ІІ памёр 2 красавіка 2005 г. у 21.37 пасля цяжкай і працяглай хваробы. Пахаванне адбылося ў Ватыкане 8 красавіка 2005 г. 1 мая 2011 г. ён быў абвешчаны благаслаўлёным. 27 красавіка 2014 г. Ян Павел ІІ быў кананізаваны папам Францішкам.
IAR/нг