Сур’ёзная аварыя водаправоднай сеткі здарылася ў гарадах Атвоцк і Карчэў, – інфармуе прэзідэнт Атвоцка Яраслаў Маргельскі. Паводле ягонага допісу ў сацыяльных сетках, аварыйная сітуацыя можа працягнуцца некалькі дзён.
"Увага! Калі ласка, не карыстайцеся вадой з водаправода OPWiK (Атвоцкае прадпрыемства водаправодаў і каналізацыі – рэд.) на тэрыторыі Атвоцка і Карчэва. У выніку аварыі вада непрыдатная для ўжывання і піцця, нават пасля кіпячэння. Забарона дзейнічае да яе адмены!" – напісаў Яраслаў Маргельскі.
Перапынак у водазабеспячэнні адбыўся з-за пашкоджання магістралі сырой вады і фільтраў на Станцыі ачысткі вады. Пасля аднаўлення падачы вада ўсё роўна будзе непрыдатнай для спажывання і санітарных патрэб.
"Работнікі OPWiK інтэнсіўна працуюць над аднаўленнем належнай якасці вады, і рыхтуюцца пункты раздачы пітной вады", – дадаў Яраслаў Маргельскі.
Таксама Урадавы цэнтр бяспекі папярэджвае, што вада ў Атвоцку і Карчэве непрыдатная для спажывання і санітарных патрэб, а таксама інфармуе, што гміна прадаставіла ваду з цыстэрнаў. Паведамленне было адпраўлена атрымальнікам на тэрыторыі Атвоцкага павета.
Атвоцк (Otwock) і Карчэў (Karczew) – гарады непадалёк ад Варшавы, у Мазавецкім ваяводстве Польшчы, у Атвоцку пражывае звыш 40 тыс. жыхароў, а ў Карчэве – амаль 10 тыс.
IAR/нг