Прэм'ер-міністр Грэнландыі асудзіў запланаваны візіт амерыканскай дэлегацыі на яго тэрыторыю. У чацвер у краіну павінны прыбыць жонка і дзеці віцэ-прэзідэнта Дж.Д.Вэнса, а таксама дарадца прэзідэнта ЗША па нацыянальнай бяспецы Майк Вальц. Чакаецца, што яны застануцца на востраве да суботы.
Прэм'ер-міністр Грэнландыі Мутэ Эгедэ абвінаваціў Вашынгтон ва ўмяшанні ў палітычныя справы яго краіны. На яго думку, анансаваны візіт ні ў якім разе нельга лічыць прыватным. Афіцыйна Уша Вэнс з дзецьмі і Майк Вальц павінны наведаць гістарычныя мясціны Грэнландыі і паглыбіцца ў тэму «грэнландскай спадчыны».
Учора ў інтэрв'ю тэлеканалу FOX News Дж.Д.Вэнс сказаў, што яму «напляваць», што думаюць еўрапейцы аб пераняцці ЗША Грэнландыі. Яму больш важныя інтарэсы ЗША, якія ён ставіць на першае месца. На яго думку, Данія, якая кантралюе востраў, дрэнна выконвае сваю працу і не з'яўляецца добрым саюзнікам.
Пасля вяртання ў Белы дом прэзідэнт ЗША Дональд Трамп казаў пра сваю зацікаўленасць у тым, каб узяць пад кантроль Грэнландыю. Афіцыйна - у сувязі з глабальнай бяспекай. У ЗША ёсць ваенная база ў Грэнландыі, якую ў студзені наведаў старэйшы сын Дональда Трампа Дональд Трамп-малодшы. Аднак Грэнландыя багатая прыроднымі рэсурсамі, у тым ліку нафтай і ўранам, здабыча якіх у цяперашні час там забароненая.
На мінулым тыдні ўсе пяць партый у парламенце Грэнландыі асудзілі папярэднія заявы Дональда Трампа аб анексіі вострава. Паводле апытанняў, большасць жыхароў Грэнландыі хочуць спыніць залежнасць Даніі, але не хочуць анексіі ЗША.
ав