Расследаванне ваенных злачынстваў Расіі ва Украіне, якое вядзе польская генпракуратура, будзе мець дапаможны характар, заявіў Генпракурор і міністр юстыцыі Збігнеў Зёбра.
Госць Polskie Radio 24 падкрэсліў, што асноўнае расследаванне па гэтай справе будзе весці Міжнародны крымінальны суд у Гаазе і ўкраінская пракуратура. Збігнеў Зёбра(Zbigniew Ziobro) адзначыў, што доказамі па справе могуць быць сведчанні бежанцаў:
- Задачай польскай пракуратуры будзе дакументацыя частковых доказных матэрыялаў, як напрыклад, сведчанняў уцекачоў, якія былі сведкамі злачынстваў, ці зробленых імі відэазапісаў.
На мінулым тыдні міністр юстыцыі паведаміў, што польская пракуратура пачала расследаванне па справе расійскага нападу на Украіну. Ён падкрэсліў, што згаданае рашэнне было прынятае пасля кансультацый з украінскімі праваахоўнымі органамі.
IAR/аз